Candidatura Andre Bosman a bira alarma fuerte den Reino
*Eleccion Prome Ministro Hulandes na momento crucial pa Reino
*Prome Ministro Hulandes ta Prome Ministro di Reino Hulandes
ORANJESTAD (AAN) — Uno di e factornan mas importante den e mundo politico di Reino Hulandes, ta e persona cu lo bay reemplasa Mark Rutte como Prome Ministro y asina lider politico nobo di Aruba.
Pa e partido di Rutte mes, VVD, e persona cu asumi liderazgo di e partido ta determinante pa futuro di e partido manera Rutte a demostra.
Te na e momento cu na 2006 su persona a presenta riba pantaya pa bira candidato pa lider di VVD, e partido no tabata loke e ta awe despues di un crecemento grandi bou liderazgo di Rutte.
Pa Reino Hulandes e sucesor di Mark Rutte den VVD si e logra mantene e sosten cu Mark Rutte tabata tin cerca Pueblo Hulandes y bira Prome Ministro Hulandes atrobe, lo bira tambe e Presidente di Conseho di Ministro di Reino y asina Ministro Presidente di Reino Hulandes.
E importancia di e funcion aki ta visto na e momentonan aki den e suspenso cu tin entorno e exigencia di politiconan Hulandes pa Aruba wordo mara na un Ley di Reino y no mas na un Ley di Aruba pa loke ta trata supervision financiero di Aruba.
Mientras e partido VVD a bisa cu e siman aki e lo anuncia un sucesor pa Mark Rutte como lider di e partido, cu ya mester confronta posibel cambio di opinion di e votadornan Hulandes, ayera a bira conoci cu e mando di partido riba su mes no por dicidi pa un sucesor pero mester eligi un sucesor despues cu Andre Bosman a presenta su mes como candidato pa bira lider di partido VVD.
Di e forma aki e prome motibo pa suspenso a presenta su mes no solamente den e partido VVD pero tambe den seno di e islanan Hulandes den Caribe, cu varios momento tabata bou critica pisa di Andre Bosman cu a ocupa e puesto di vocero di asuntonan di Relacionnan den Reino pa VVD den Parlamento Hulandes.
Bosman, cu tabata kier un Mancomunidad di cuatro pais di Reino Hulandes pa futuro estatal di Reino Hulandes, semper tabata tin critica pisa riba gobernacion na e parti Caribense di Reino.
Hunto cu informantenan importante DIARIO a biaha den pasado di e partido di Mark Rutte pa topa cu e momento cu na 2006 casi e partido VVD di Rutte a kibra ora Rita Verdonk a bay contra candidatura di Mark Rutte, cu a gana votacion den seno di e partido.
Esaki ta nifica cu actualmente un candidato cu partido VVD tin na vista, lo mester enfrenta e figura di Andre Bosman, un persona controversial den Reino y sigur na e paisnan Caribense den Reino.
Cu informantenan importante DIARIO a discuti e posibilidad pa e disputa entre Reino y Aruba pa loke ta trata supervision financiero na Aruba, yega na un fin.
Pa atende e punto aki mester bolbe na introduccion di Statuut na e islanan y e actitud Hulandes cu a bini dilanti na añanan 70 ora Hulanda tabata pasa den un tempo basta dificil y tabata wordo goberna dor di Gobierno Joop Den Uyl, cu a expresa su mes na fabor di independencia.
Ta na fabor di Independencia como concepto estatal, Joop Den Uyl a sostene e salida di Surinam for di Reino Hulandes.
Independencia ta diferente for di Status Aparte pasobra e ta deshaci di e responsabilidad directo di Reino den e concepto di Status Aparte.
Independencia financiero di e paisnan nobo di Reino den Caribe ta bira un punto central den e proximo eleccionnan na Hulanda segun informantenan, cu a indica cu por lubida cu e sucesor di Rutte ta deshaci di supervision Hulandes como un arma pa garantia di un bon maneho financiero cu ta base pa independencia financiero.
“E exito di Rutte marca pa su tempo largo como Prome Ministro di Hulanda, tabata basa riba su filosofia di partido liberal cu el a pone den practica. E filosofia aki ta basa riba libertad como punto central,”a bini dilanti.
Con leu libertad por yega a keda semper e problema ya cu ta dificil pa yega na definicion exacto.
E pregunta aki a bira e factor importante na final di careda di Mark Rutte como Prome Ministro Hulandes cu awe mester enfrenta realmente e otro banda di medaya, cu ta e problemanan esencial cu no a wordo soluciona y ta grita pa un solucion.
Crecemento economico mundial cu na Hulanda a percura pa mas migracion sigur for di e teritorionan Hulandes na forma special den problemanan cu a presenta nan mes na Molukken, Indonesia y sigur tambe e independencia di Surinam.
Futuro politico di Hulanda a bira central den Reino, cu na momento di recuperacion despues di Pandemia, Guera y inflacion awor ta topa cu eleccion di un Prome Ministro nobo pa Hulanda mes pero tambe pa Conseho di Ministro di Reino Hulandes.
