Destinacionnan turistico na paisnan calor por wordo afecta
*Barconan tambe lo mester paga pa daño na medio ambiente
*Aumento gastonan cu transportacion maritimo ta realidad
ORANJESTAD (AAN) — Cambio di clima cu tabata un tema cu no tabata haya e atencion cu e merece, awor ta den centro di noticia pa e resultadonan cu e ta produci.
Calor tremendo na un parti di mundo y tormentanan pisa na otro parti, ta loke ta avisa mundo cu e momento a yega pa tur hende tuma medida pa enfrenta tanto e problemenen cu por spera como medidanan cu mas y mas pais ta tuma y lo afecta e comunidad internacional na diferente forma.
E resultado mas directo sigur lo ta e forma cu gastonan ta aumenta riba productonan pa diferente forma.
Gastonan di transportacion ta subi mientras gobernantenan rond mundo ta pone sancionnan pa asina cubri e gastonan espantoso cu medidanan contra cambio di clima ta encera.
Hopi atencion a wordo dedica te awor na e transportacion pa medio di vehiculonan y avion y e sancionnan cu a wordo introduci y cu ta combati contaminacion di medio ambiente pero tambe ta afecta e cartera di publico.
E impacto social grandi di cambio di clima sin duda, lo bira e forma cu e ta afecta tambe mundialmente e entrada di hopi famia cu tin gastonan cu ta sigui sigui.
Na 2024 e situacion lo conoce un cambio positivo, pero mas bien lo bay crea mas problema pa e ser humano cu mester percura pa e por biba den su medio ambiente pero tambe sigura cu e tin su pan di cada dia.
Con pone e balansa entre e interesnan di cada hende, di cada negoshi y di cada pais? Con pone e balansa pa futuro, ta loke ta bini dilanti continuamente.
Cambio di clima ta percura pa problema cu empleo den sectornan cu ta percura pa entrada di un cantidad enorme di famia.
Si turma por ehempel e ramo di turismo, por tuma nota con e bienestar personal di un persona ta depende di e produccion di entrada cu e ramo di turismo ta permiti.
Informacionnan internacional ta indica con turismo ta adapta su mes na cambio di clima, cu produccion financiero di turismo mester yuda adapta na un forma cu e por sirbi interes di comunidadnan.
Cifranan cu ta wordo copila ta mustra entre otro cu cambio di clima a haci cu hopi pais cu tabata wordo considera durante e temporadanan calor, awor tin temperaturanan mas halto.
Esaki ta nifica menos friu, cu resultado cu durante vacacionnan di verano, zomer, mas y mas hende ta prefera di bishita lugarnan cu tabata demasiado friu cu bay pasa nan vacacion na lugarnan cu calor ta afecta seriamente.
Na mes momento, desastre natural ta causa daño na centronan conoci pa turismo y actividadnan cu generalmente ta atrae publico grandi.
Bida a bira mas pisa dor di e situacion di tempo sigur pa e personanan cu menos recurso, cu no solamente ta bira nan entrada na diferente ramo di turismo baha, pero tambe nan exigencianan pa sobrevivi e cambio di clima wordo afecta.
E proceso di cambio di clima ta keda un preocupacion grandi cerca hende, causante di e desastre actual cu tabata facil pa ocasiona pero sumamente dificil pa remedia.
Kico resultado di medidanan na hopi pais na 2024 pa trafico maritimo lo tin como resultado ta keda un pregunta grandi. Cu e efecto lo ta grandi, ta un seguridad.
Kico hende por haci? Actua pa cuminsa den su propio bida y den su vecindario pa cercano.
Hopi ta e informantenan den varios sector cu ta mustra con hende ta sigui neglisha e resultadonan cu ya ta bisto di clima y ta sigui aporta na loke ta destrui futuro, cu ya a cuminsa y ya ta duna prueba cu e nivel di bida lo wordo directamente afecta pa actitud negligente enfrente naturalesa.
Durante e temporada di vacacion, naturalesa lo hunga un rol importante. Naturalesa lo dicidi con e hende ta relaha, ta disfruta di momentonan cu normalidad di trabou no ta permiti.
E momento a yega pa debolbe naturalesa su importancia den bida humano y cuida medio ambiente na bienestar di uno y tur y sigur pa turismo, cu ta base di entrada pa Aruba y un parti grandi di mundo, cu ta gana su pan di cada dia cu entrada di turismo!
