Instructor Carol Boekhoudt:
ORANJESTAD (AAN) – Señora Carol Boekhoudt, Instructor di Landamento pa muchanan di scol basico, den entrevista cu DIARIO cu a tuma lugar na Piscina Olimpico, a informa cu dialuna 3 di Juli, a clausura e examen di landamento di scolnan basico klas 3.
A participa Scol Soeur Juliette, Caiquetio Scol, y Pius-X Scol. Den e prome ora tur e muchanan a logra di haal nan diploma A. E siman aki tabata tin examen pa diploma A y diploma B. Boekhoudt a menciona cu siman pasa caba nan tabata tin un examen pa e muchanan cu no a logra di yega na un diploma pero a haya un certificado cu yama “Cangreu contento” y “Strea di lama”.
Ademas, e muchanan cu a haya Diploma A y B caba tambe a ricibi un certificado “Pisca bulado” y “Heroe di rescate”.
Señora Boekhoudt a splica cu den Derde Klas ta conoci cu e muchanan no ta haya gymnastiek pero ta haya les di landamento. Esaki ta asina for di 30 aña pasa.
Por cierto, e dama a señala: “e aña aki e proyecto di landamento escolar aki, cu gobierno a funda na aña 1993, ta celebra 30 aña di existencia, y e resultadonan ta tremendo”.
Hopi di e muchanan aki, despues di Derde Klas mayornan ta hiba nan clubnan priva di landamento unda nan ta sigui pa haya e siguiente diplomanan. “Hopi mucha ta pa prome biaha nan ta bin les di landamento tambe, y e parti bon ta cu un temporada di e aña escolar nos ta bay den lama y un temporada nos ta bin na piscina cu nan. Pues, nan ta haya dos ambiente pa nan haya les di landamento”, señora Carol Boekhoudt a indica.
E meta di e proyecto aki ta pa e muchanan kita e miedo di lanta y defende nan curpa den awa. Tur mucha di Derde Klas ta participa den e lesnan y e total por ta rond di 1.800 mucha pa cada aña escolar. E ta parti di e curriculum di Derde klas y ta bin un cifra riba nan rapport, señora Boekhoudt a señala, mescos cu den tur otro klas cu muchanan ta haya gym les.
Carol tin un mensahe pa mayornan di muchanan cu ta bay drenta Derde Klas y esaki ta: “No tin miedo, pasobra nos ta instructornan capacita, nos tin hopi aña di experiencia; esaki ta e miho momento pa laga bo yiu doe mee cu les di landamento, y despues di esaki no stop. Laga bo yiunan sigui doe mee otro clubnan pa nan haal nan diplomanan” Carol a conclui, no sin prome gradici tur e instructornan pasobra nan a traha hopi duro, den solo, durante e aña escolar aki, pa logra cu e muchanan a haya Diploma A y Diploma B”, Carol Boekhoudt a conclui.
{gallery}Alumnonan di Scol Soeur Juliette, Caiquetio Scol y Pius-X Scol a haya nan diploma A y B di landamento{/gallery}
