ORANJESTAD (AAN) -- Tito Lacle tambe a tuma e palabra den conferencia di prensa en conexion cu e reunion cu Formador Wever-Croes y el a trece dilanti cu a hala su atencion cu varios parlamentario y futuro minister tin e pregunta “ken ta prensa”? Y por a nota cu no tin e claridad ey.
Lacle a expresa cu danki na e presencia di e tres representante di prensa den e reunion, entre nan su persona, a set un base, un comienzo pa determina ken na Aruba, specificamente y en realidad ta prensa y cuanto periodista tin na Aruba. Nan a wordo puntra ken ta prensa, cuanto medio tin na Aruba, y esaki ta un pensamento cu tin y hopi no sa e contesta, pero danki na e parti aki, Lacle ta sigur cu den futuro nan lo ta hopi abierto pa streamline esaki y hacie di un forma cu “ones and for all’ tur hende sa ken na Aruba ta periodista, cual ta esnan cu ta trahando como periodista pa nan tene cuenta mas lihe ora cu tin problema.
Tocante transparencia Lacle a bisa cu berdad den pasado ora cu prensa a kier a bay haci mas pregunta, e porta ta dal cera. “Anto eynan, no tabata tin nada concreto pero promesanan a wordo haci cu lo follow up riba esey y a duna indicacion cu nan no tabata sa tur problema y danki na e prome combersacion aki a habri e porta cu tur e problemanan cu boso nan tur ta mustra lo haya un atencion debido, y nan ta hopi dispuesto na haci e cambionan aki”, Tito Lacle a splica.
El a agrega cu Minister Presidente a bisa cu tin hopi punto cu e no tabata sa cu ta un problema, pero door di e combersacion aki a bira cla cu nan lo wak e grupo di prensa cu otro wowo; na lo deal cu prensa na un forma diferente. E no a bisa cu lo sosode mañan pero lo sosode y nan tin e boluntad pa esaki. Tito Lacle a agrega cu tin un grupo serio cu tur siman ta den conferencia di prensa, y tin hopi cu ta yama nan mes prensa ora cu tin algo leuk pa trata, pero tin hende cerca di gobierno cu ainda no sa, specificamente, ken ta prensa. “Pesey, sperando cu esey lo cambia aworaki, for di e reunionnan cu lo bay sigui pa nos por streamline esey, cera e gap y determina for once & for all, kendenan nan tur ta prensa, pa no sosode loke a pasa den e ultimo pandemia cu hendenan no sa diripiente ken ta prensa y nos tur a wordo trata na un forma cu no mester hacie nunca mas”, Tito Lacle a remarca.
