A habri siman cu otro atake riba sistema di 'fiber optic' di SETAR

Madruga malhechornan tabata activo atrobe 

ORANJESTAD (AAN):  A habri siman cu atrobe c'un noticia desagradabel. Un biaha mas a bin constata cu antisocialnan a comete nan fechorianan y a corta e wayanan di 'fiber optic' afectando e sistema di Setar, e biaha aki den area di avenida Nelson Orlando Oduber, den becindario di Taco Bell.

Den entrevista cu Ronica Lopez, Sector Manager di Asuntonan Comercial na SETAR, el a splica cu ta duel nan profundamente di ta para un biaha mas cu un anuncio parecido na esun di siman pasa, diabierna madruga.

Esaki tabata e prome atake riba e red di 'fiber optic' di SETAR na unda cu malhechornan a corta den e kabelnan di 'fiber optic' na Seroe Blanco, lagando asina un gran cantidad di cliente 'down'. Algun di nan tabata e banconan local, comercio, servicionan di gobierno, entre otro, di diabierna pa diasabra mainta.

Un team di tecniconan a logra recupera alomenos e parti bancario bek relativamente lihe. Pero a tarda te cu diadomingo anochi laat, pa tiki tiki e clientenan por a haya nan sistema bek, Lopez a señala.

Esaki tabata un trabao y un daño masha grandi mes cu a afecta no solamente SETAR, pero e clientenan y henter Aruba, a remarca.

"E ultimo cos cu nos tabata tin gana di habri nos siman cu ne ta algo parecido cu a sosode awe madruga (dialuna) na Palm Beach", a señala.

No por bisa cu atrobe ta trata di e mesun malhechornan cu a comete e acto aki ya cu polis ta investigando esaki. Den e caso aki, a wordo confronta atrobe cu hendenan cu a saca e wayanan di 'fiber optic' y corta aden.

E incidente aki a afecta e area di Palm Beach unda tin Hospital riba dje, hotelnan, comercio, entre otro.

Ta trata di un kiebro mas chikito compara cu esun di Seroe Blanco y esey ta nifica cu lo a logra lante bek mas lihe, pero no kier afecta turismo ni economia di e isla, Ronica Lopez a enfatisa.

E caso ta den man di polis ya cu ta un situacion basta serio y ta spera di por saca afo pronto ken ta tras di e atakenan aki. Tin hopi teoria, rumor of pensamentonan, pero Recherche ta haciendo su trabao.

Ta sospecha cu e atake criminal lo a sosode rond di 1:30 am, Lopez a duna di conoce. Mientrastanto, banda di 1 pm e tecniconan specialisa a logra restablece e sistema.

Un yamada na tur esnan cu por a mira algo sospechoso pa comunica cu polis na tiplijn 11141.