ORANJESTAD (AAN): Dialuna mainta durante un conferencia di prensa parlamentario di fraccion di MEP Ricky Hoek a indica cu den Parlamento ta bay trata e rapport ‘Coral Reef Baseline Studies’ di 2019,
cu a wordo skirbi pa CARMABI (Caribbean Research and Management of Biodiversity).
“Esaki ta bay duna un bista riba con e bida marino rond di Aruba ta”.
Nos tin cu tene cuenta cu e bida marino rond di nos isla y proteha esaki.
Pesey durante e reunion den Parlamento nos ta bay haci algun pregunta riba kico ta e recomendacionnan cu a sali for di e rapport aki, segun Hoek.
El a sigui bisa cu ta importante pa tene cuenta cu e bida marino tambe pa motibo cu e ta contribui na turismo cu ta algo cu na Aruba nos ta biba y depende di dje.
“Nos sa cu e turismo cu nos ta trece Aruba y ta disfruta di nos beachnan y e bida marino tambe tin un impacto riba e coralnan, e piscanan y e bida marino cu tin”.
Pesey e rapport ta duna recomendacionnan y nos ta bay wak kico mas ta wordo bisa y kico mas mester trata den Parlamento pa ehecuta esaki y hacie un proyecto sostenible pa e futuro generacionnan por uza y pa e turistanan por sigui disfruta di e bida marino aki na Aruba, segun e parlamentario di e fraccion geel.
DIARIO a puntra Hoek si e parlamentarionan a haya e rapport for di trempan caba y el a indica cu algun dia pasa nan a haya esaki y e parlamentarionan a pasa riba esaki.
El a sigui bisa cu siman pasa Diahuebs tabata tin un reunion publico, unda cu D.O.W, DNM y representacion di minister Ursell Arends tabata presente y nan a duna parti di informacion cu ta toca e rapport.
“Ora mi a studia e rapport mi a mira cu tin cierto legislacion cu mester bin pa pone cierto regla y leynan pa cuido di nos bida marino”.
Nos mester bin cu cierto linea y un bon ‘framework’ den cual nos por traha, pa asina no solamente nos ta cuida y proteha no bida marino, sino tambe nos ta sigui duna nos localnan y turistanan e posibilidad cu nan por sigui disfruta di nos bida marino, pero na un manera cu esaki ta wordo proteha tambe, segun e parlamentario.
