A firma acuerdo pa evalua potencial di gas y petroleo den area maritimo di Aruba

Minister Glenbert Croes ta anuncia:

* CAP y Armstrong International na cabes di proyecto 

ORANJESTAD (AAN): CAP (Compania Arubano di Petroleo) hunto cu Armstrong International, un compania di petroleo renombra di Merca, a firma un MoU pa colabora riba un estudio pa evalua e potencial di hidrocarburo den e area maritimo di Aruba.

            E meta di e MoU ta pa Armstrong International conduci un estudio comprensivo utilisando tur e datonan geologico y geofisico disponibel. E estudio lo inclui un interpretacion di e datonan sismico existente.

            Basa riba e datonan aki, un modelo geologico lo wordo produci y prospectonan di hidrocarburo lo wordo identifica.

            Despues di e resultadonan decepcionante di e pos exploratorio (Bon Bini-1X) cu a ser bora na 2018, actividad riba tereno di exploracion pa hidrocarburonan na Aruba tabata hopi limita.

            Cu e firmamento di e MoU aki, ta wordo spera cu lo mira e datonan existente cu un bista fresco cu lo por resulta den un perspectivo nobo pa locual ta e potencial di hidrocarburonan den Aruba su area maritimo.

            Segun e Minister di Energia, Sr. Glenbert Croes, "Nos ta cautelosamente optimista pasobra esaki ta oportunidadnan importante pa explora, pa nos por logra stabilidad energetico, economico y bonansa financiero pa Aruba”.

            Armstrong International ta un subsidiario di Armstrong Oil and Gas, basa na Denver, Colorado. Armstrong O&G ta un compania independiente cu un historia exitoso y experiencia substancial den exploracion pa hidrocarburonan na Merca, incluyendo algun campo di petroleo gigante na Alaska.

            Esun mas recien ta e campo Pikka cu mas cu 2.5 biyon bari na e North Slope di Alaska. Pikka ta un di e descubrimentonan mas grandi na Merca den e ultimo decada. E team di Armstrong ta consisti di algun ehecutivonan cu un historia exitoso den exploracion, incluyendo algun descubrimentonan den paisnan alrededor di Aruba.

            E transicion di energia pa energia renobabel a cuminsa, pero energia renobabel ainda no por suministra 100% di e demanda, pues 'fossil fuels' lo keda indispensabel pa e proximo decadanan. Prijs di petroleo mundialmente ta subiendo, parcialmente debi na e conflicto na Ucrania y demanda cu ta sigui crece.

            Na mesun momento e ambiente geopolitico a crea un falta substancial den inversion pa e sector mundial di energia, specificamente den exploracion pa hidrocarburonan.

            E firmamento di e MoU ta representa un paso concreto di e empresa di estatal CAP y  Gobierno di Aruba pa logra independencia di energia por medio di stimula colaboracion strategico cu ta facilita inversion di tecnologia nobo pa acelera e proceso.

            "Den luz di e retonan global di energia cu continuamente ta surgiendo, esaki ta marca un paso importante den nos plan y esfuersonan," asina Minister di Energia Sr. Glenbert Croes, a bisa cu orguyo.