Maneho di Prome Ministro Hulandes a expone punto cardinal
*Mantencion di poder di compra a dicidi pa recuperacion Aruba
*Schrap debe di Covid-19 di empresanan tabata decision crucial
ORANJESTAD (AAN) — “No solamente pa Reino, pero pa henter mundo, e desaroyonan politico actual na Hulanda ta entrega e prueba cu e maneho economico y financiero cu un pais ta hiba, tin resultado social directo pa un Pueblo.”
Palabranan di expertonan cu DIARIO ta sigui consulta cu vista riba loke ta pasa actualmente den mundo politico Hulandes y ta manda mensahenan sumamente importante pa henter Reino.
Den e desaroyonan actual na Hulanda, e pregunta mas importante ta keda, con por ta posibel cu un pais rico manera Hulanda, conoce problemanan social cu a causa, cu den e cifranan cu a prepara pa Hulanda pa 2024, mester inclui un suma di Dos Miljard na ultimo hora pa atende cu e pobresa creciente na Hulanda.
E forsa di compra di e Hulandes a wordo afecta. Cu bon entrada produci pa trabou, e Hulandes a bira pober, pasobra medidanan di Gobierno a deshaci di loke e por a gasta pa su propio gastonan cu a sigui subi pa falta di atencion pa problemanan social.
“Prijs awa, coriente, gas cu mester pa tene casnan cayente ora bira friu, a subi drasticamente. Diferente tipo di belasting a subi. E peso di gobernacion a aumenta y a destrui e poder cu Pueblo Hulandes tabata tin pa come, pa huur of construi un cas, pa su transportacion, pa su bienestar general,”a bini dilanti.
Manera informantenan clave a trece dilanti, clase medio ta forsa di Hulanda y den Reino cu, awe mester presta atencion con na forma democratico e ta hiba un maneho social.
Gobierno Hulandes ta rico pero el a introduci un maneho den cual e no a tene bista cu ademas di placa pa estado funciona, mester di placa pa e hende funciona den un democracia real.
Con esaki ta relaciona su mes cu e exigencianan cu Hulanda ta presenta na Aruba pa maneha su presupuesto, ta bini claramente dilanti den informacionnan financiero di tanto Hulanda como Aruba.
“Aruba a baha su gastonan di Gobierno pero na mes momento Aruba a percura pa un crecemento economico cu a atende cu e necesidad di e Pueblo pa e tabata tin entrada pa e cubri su gastonan, “a bini dilanti.
E hecho cu mester importa trahador na Aruba, ta duna prueba no solamente di falta di hende pa ocupa e puestonan di trabou.
“Mescos cu tur producto, ora tin demanda pa trahador, e placa cu tin pa paga trahador ta aumenta. Ora entrada di un compania baha, esaki ta un prueba cu e no tin demanda pa mas trahador y mester baha e suma cu e tin pa paga trahador,”informantenan ta indica.
Central den e forma cu Gobierno Wever-Croes a alivia situacion financiero di e clase media, e hendenan cu no ta rico ni pober y ta mayoria di e Pueblo cu ta sostene economia y asina entrada di e pais, ta loke a pasa cu Covid-19.
Gobierno y empresanan priva cu ta percura pa entrada di trahador na Aruba, mester a cera nan porta durante e temporada di Covid-19.
Resultado tabata cu no tabata tin entrada pa trahadornan. Gobierno di Aruba a facilita e placa pa empresanan por a sigui paga trahadornan aunke nan salario por a baha a base di e areglo aki.
Empresanan priva a keda cu debenan enorme na Gobiernonan di Aruba y Gobierno di Hulanda. Na Aruba, Gobierno a dicidi cu empresanan no ta debolbe e prestamo pero na Hulanda empresanan mester debolbe e prestamo y deurwaarder ta bay cobra.
Esaki ta nifica cu e empresanan na Hulanda ta wordo confronta cu gastonan mas halto cu nan no por paga ya cu ainda nan situacion financiero no a recupera completamente.
Na Aruba, e empresanan di Aruba no mester debolbe e sumanan cu a mantene trahadornan na Aruba na trabou hasta ora Covid-19 a haci cu nan no por traha.
Awe mundialmente por mira con inflacion a destrui e bienestar di e trahador despues di Covid-19.
E grupo realmente pober di paisnan democratico, ta ricibi asistencia di estado. E grupo rico di e pais, sigur si e ta dispone di empresanan internacional, tin sosten di nan fuente internacional.
E trahadornan y e empresanan priva chikito, cu ta forma e gran mayoria di e pais pero tambe ta e clase media, mester di un economia cu no ta produci solamente belasting pa Gobierno pero ta duna e trahador oportunidad pa haci compra den comercio pa asina democracia funciona.
Informantenan ta indica cu gobernacion di Aruba ta mantene atencion den Reino pa e calidad di bida di e clase medio, e trahadornan y empresa chikito, cu ta sostene economia y base social di e pais.
