A firma acuerdo cu Rode Kruis pa nan tin acceso na e centro di detencion na Guarda nos Costa

ORANJESTAD (AAN): Recientemente, Minister di Husticia y Asuntonan Social Sr. Rocco Tjon, a firma un acuerdo cu Rode Kruis Aruba,

pa asina dunanan acceso na e centro di detencion na Guarda Nos Costa (GNC). Di e manera aki tambe ta cumpli cu e norma y balornan fundamental di derechonan humano.

   Sr. Tjon a expresa cu e acuerdo aki ta un paso hopi importante den cuadro di transparencia como tambe den cuadro di salvaguardia e derechonan humano. E realidad ta cu nos ta biba den un estado di derecho, caminda tur hende tin cierto derechonan y como pais tambe nos tin cierto responsabilidad pa garantisa cu e circunstancianan di detencion ta segun e reglanan y normanan internacional.

   Den cuadro di e cooperacion aki, Rode Kruis lo tin acceso pa asina wak e circunstancianan pero tambe brinda un ayudo na tur esnan cu ta worde ubica na Guarda Nos Costa en espera di nan biahe pa bay back nan pais. Segun e Mandatario, esaki ta un paso concreto, mirando cu siman pasa a ricibi bishita di Amnesty International tambe. Amnesty International ta un organizacion no-gubernamental internacional basa na Reino Uni, cu ta enfoka su mes riba derechonan humano. Pues esaki ta uno cu ta bay man den man cu loke cu kier logra cu e acuerdo aki entre Rode Kruis y Guarda Nos Costa.

   Por ultimo, Sr. Tjon a indica cu den tur transparencia, un di e metanan di Ministerio di Husticia y Asuntonan Social ta pa demostra con e circunstancianan lo bay worde mehora. Den cuadro di esaki tin diferente inversionnan tambe cu ta worde haci na Guarda Nos Costa pa loke ta facilidadnan, entre otro e cooperacion estrecho cu tin cu Hulanda tambe, caminda fondonan ta worde poni disponibel pa e tematica aki. Apesar cu e cooperacion aki ta uno cu ta existi caba, awo por bisa cu esaki a keda formalisa por medio di un acuerdo oficial y di e forma aki, lo bay mira con e cooperacion aki lo sigui mehora den e futuro cercano.