ORANJESTAD (AAN): Aruba Hotel & Tourism Association (AHATA) a patrocina e gastonan pa modernisa e curiculo di e programa culinario na Colegio EPI.
Cu e sosten aki, AHATA ta enfatisa e importancia di un enseñansa culinario avansa na Aruba, garantisando cu nos futuro chefnan ta prepara pa exigencianan di e industria di hospitalidad y por goza di un carera exitoso.
E adaptacion di e curiculo culinario a wordo implementa door di Chef Calvert Cilie, un miembro valioso di e Culinary Arts Program di EPI desde 1996.
Durante su añanan di dedicacion, Chef Cilie a demostra experencia, boluntad, y liderazgo exepcional den e mundo di enseñansa culinario.
Chef Cilie a incorpora e modelonan di HKS y BKD den e programa culinario. E mehoracion strategico aki lo eleva e calidad di enseñansa culinario, door di introduci metodologianan mas sofistica, stimula innovacion, y equipa studiantenan cu habilidadnan practico.
E contribucion di AHATA den e desaroyo di e curiculo aki ta un paso clave pa fortalece talento local den e industria culinario di Aruba. AHATA ta keda comprometi na apoyo di iniciativanan cu ta sera e conexion entre enseñansa y e necesidadnan actual di nos mercado laboral.
Presidente y CEO di AHATA, Sra. Tisa LaSorte a gradici Sr, Cilie, den presencia di Directora General di Colegio EPI, Sra. Ankie Danker, Unit Manager di e facultad di Hospitalidad y Turismo, Sra. Gloria Vega, y Manager di Curso, Sr. Andres Geerman.
