Zoraida Conijn di Luna Foundation ta reacciona
ORANJESTAD (AAN): Zoraida Conijn di Luna Foundation ta splica cu ta di lamenta cu autoridad a duna hende boet pasobra nan a duna cacho cuminda riba caya. Esey no ta bon, a expresa.
El a sigui bisa cu Luna Foundation a cuminsa cu nan trabao dunando cuminda na cachonan cu ta riba caya. Pero tin cu cria nan unda hende no tin molester di nan. E cachonan ta riba caya, e problema tey y no por haci manera no ta wak nan, pasobra awendia e problema ta pio cu nunca, a remarca.
Segun Conijn, e ta compronde cu tin hende cu kier cria nan pasobra no por laga nan pa nan cuenta tampoco. Nan ta benta e barinan di sushi abao, nan ta drenta den cunucu y mata bestia pasobra nan tin hamber. E cachonan no a nace riba caya. Ta e mesun hendenan a tira nan riba caba, a expresa.
Cu otro hende kier yuda nan pa nan no ta sufriendo riba caya, pesey e no ta compronde pakico tin cu duna e hendenan aki un boet, a bisa.
E ley a bin pa stop tur hende cu ta cria cacho, te hasta e fundacion. Si no ta cria nan, nan ta muri riba caya, nan ta morde hende y nan ta bira un molester. Nan ta ataca pasobra nan tin hamber. Pakico no ta laga hende cria nan?, a cuestiona.
E representante di Luna Foundation a agrega cu aworaki "ta bay off partiendo boet" y pakico parti boet na esunnan cu ta yudando y pakico no parti boet cu esnan cu ta causando e problema?", a declara.
E ta recomenda pa cambia e ley, pasobra no por castiga esnan cu ta yuda. Mester pone staf riba esnan cu ta causante di e problema y parti boet na e doñonan iresponsabel y no na e bestianan cu ta sufriendo riba caya.
"Ki role model nos ta? Unda nos isla ta bay asina?", a bisa.
Zoraida Conijn a laga sa cu a papia cu e fundacionnan pero toch a bin cu e ley y e ley ta pa tur, pa e fundacionnan tambe. E boluntarionan cu ta riba caya nan tambe tin cu atende cu polis.
El a agrega cu e fundacionnan tin un aliansa cu ta cinco fundacion cu ta traha hunto y a forma un otro fundacion. Nan por sinta papia, pero cuanto aña nan tin ta papiando caba y nada no ta sosodiendo. Tin un par di cosnan ta cambia, pero ta cosnan chikito. Pesey e no ta compronde con esun di e boet a bay asina lihe, pero tanto otro cos cu nan ta pidiendo, no ta tende nada di esey.
"Unda e placa di e boetnan aki ta bay? Si bo ta parti boet uz'e tambe pa e cachonan, pa siña nos comunidad con pa deal cu e cacho, sino e problema ta keda", a expresa.
Den e proximo simannan lo tin un reunion cu algun parlamentario y e fundacionnnan lo sugeri pa e situacion mehora y pa nan wak cuanto cacho maltrata e fundacionnan tin cu atende. Pa nan wak kico ta causa cu e cachonan ta benta un bari abao. Si nan tin hamber y nan ta hole cuminda unda cu ta nan ta bay p'e, a splica.
