Shailiny Tromp-Lee, fraccion di MEP:
ORANJESTAD – Den conferencia di prensa di e fraccion di MEP- señora Shailiny Tromp-Lee, Presidente di e Comision di Enseñanza di Parlamento, a elabora tocante un reunion cu a tuma lugar siman pasa den e Comision aki.
Parlamentario Tromp-Lee a indica cu e Comision di Enseñanza ta teniendo diferente reunion tanto cu Gobierno como cu Departamentonan cu ta encarga cu diferente tema di interes y importancia pa Aruba.
El a relata cu e reunion di siman pasa tabata cu e Departamento di Mucha y Hoben su Coordinadora señora Sue Ann Ras, y profesionalnan cu ta traha hunto cune. Nan a haci un presentacion hopi amplio den cual a trata diferente aspecto y sigur un di interes cu pa hopi aña ta trahando riba dje ta e Ley di Kinderopvang.
Ta conoci cu e centronan di cuido di mucha ta hayando un structura dentro di cual nan tin cu traha cu cierto reglamentonan cu nan tin cu cumpli cu nan.
E ley di Kinderopvang a keda aproba na aña 2017, y aña pasa Parlamento a trata cambio den dicho ley, pasobra ora el a wordo pasa tabata tin hopi fout y tabata carece di cierto contenidonan.
“Aña pasa nos a percura pa e cambionan aki tuma lugar, cumpliendo cu e necesidadnan di e veld, y tambe cu tur loke e Tratado di Derechonan di Mucha ta indica, y tambe pa haci su implementacion aki na Aruba uno realistico, y cu pronto lo por bira un realidad tambe”, Tromp-Lee a señala.
E por a compronde for di e Departamento di Hoben y Mucha, cu nan a haci un registro nacional, y actualmente tin 109 centro di cuido, 88 a registra nan mes oficialmente. E parlamentario a haci un yamada na esnan cu ainda no a registra oficialmente, pa haci esaki.
E ta na bienestar di nan negoshi pero tambe na cumplimento di e reglamento cu ta bay bin, y cu ta existi caba pa loke ta trata proteccion y seguridad di nos muchanan. Loke a wordo enfatiza tocante e ley aki, ta cu ainda tin un proceso tumando lugar, y aki sigur tin un tarea como Parlamento pa haci, mirando cu nan a aproba, aña pasa, e cambionan cu tabata necesario den e Ley di 2017, pero te dia di awe e Ley no ta implementa.
“Nos tin cu percura pa e bira realidad y esaki ta un caminda cu nos como Parlamento, y sigur como Comision di Enseñanza, nos ta bay haci trabao di dje, pa urgi gobierno pa percura pa e proceso keda finaliza cu tur e Landsbesluitnan rekeri ta in place, pa enberdad e Ley por bay den implementacion berdadero pa garantiza, entre otro, seguridad, proteccion pa esnan mas chikito aki na Aruba”, Parlamentario Shailiny Tromp-Lee, a remarca.
