A crea Fundacion FUDA cu ta bay yuda pashentnan cu ta terminalmente malo

Transporte gratis pa nan 

ORANJESTAD (AAN): Recientemente e damanan Renate Raven y Shariënne Winteraal tabata na oficina di Notario Yarzagaray pa un ceremonia hopi special.  Pasobra e momento ey, nan a firma e statutonan pa inicia cu e proceso di establece e Fundashon Ultimo Deseo Aruba “FUDA”.

   DIARIO a compronde cu e Fundacion aki a worde estableci pa esnan cu ta terminalmente malo, cu ta den necesidad di transporte special, unda lo mester ta drumi plat durante transporte. Den cada un di nan ambulance di transporte, nan lo por cumpli cu e ultimo deseo di cada pashent, y asina hiba nan na unda nan lo kier bay, sea nan luga faborito, un atraccion of cerca famia y amistad.

   E bon noticia ta cu esakinan lo no tin gastonan envolvi pa e pashent.  Tur e deseonan cu nan lo cumpli, nan lo haci’e den un forma gratuito. E gastonan di transporte lo worde cubri por medio di Fundacion FUDA.

   Ainda nan no ta cla pa cuminsa cu e servicio.  A compronde cu e prome paso importante a worde poni, a establece oficialmente e Fundacion, pero awo tin hopi otro cos cu lo mester worde regla. Nan deseo ta pa por cuminsa den e prome cuartal di aña 2024, y asina percura pa e fundacion ta completamente operacional.

   DIARIO ta desea Renate y Shariënne hopi exito cu nan Fundacion.