ORANJESTAD (AAN): Relaciona cu training riba Dialuna, y despues e Acto Protocolario di Aña Parlamentario nobo riba Diamars, Polis y DOW lo cera diferente caminda den centro di Oranjestad y algun lo ta parcialmente cera y trafico lo worde dirigi.
Mester tene cuenta cu e siguiente fechanan:
Dialuna, 11 di September for di 8'or pa 10:30 di mainta pa e training y Diamars, 12 di September for di 7'or mainta pa 12'or di merdia pa e acto protocolario.
E camindanan cu lo worde cera ta lo siguiente: L.G. Smith Blvd for di e crusada cu Adriaan Lacle Blvd pa tur trafico cu ta bay direccion Pabao. Tambe L.G. Smith Blvd for di e crusada cu Paardenbaaistraat pa tur trafico cu ta bay direccion Pariba.
Tambe parti di Oranjestraat for di crusada cu L.G. Smith Blvd te cu e crusada cu Wilhelminastraat. Tambe parti di Zoutmanstraat for di e crusada cu Zuidstraat direccion Oranjestraat.
Cuerpo Policial Aruba ta haci un peticion na comunidad pa evita di keda pega den trafico pa desvia y tuma otro ruta alternativa.
