A constata cu ainda tin hopi confusion riba con pa aplica e ley di lactancia materno

Caroll Kock di Fundacion Pro Lechi Mama

ORANJESTAD (AAN): Caroll Kock, Presidente du Fundacion Pro Lechi Mama a duna di conoce cu e fundacion ta e master riba tereno di lechi materno.

            Nan tin un trayectoria di 20 aña dunando informacion y sosteniendo tur mama cu kier duna nan yiu pecho y cu a scoge pa duna esey, a bisa.

            El a agrega cu segun cifranan, desde cu Pro Lechi Mama ta activo na Aruba e cifranan di lechi materno a casi triplifica. Pero mas cu esey, nan tin e expertonan 'in house', cu ta Minouche Lopez y Marlene Stamper. Nan ta dos di e instructornan den e 'breastfeeding master class' cu nan ta ofrece.

            Nan a disena e 'master class' aki, cual a tuma lugar diasabra ultimo cu e meta di empodera e mamanan of futuro mamanan, Kock a splica.

            El a menciona e parti di e ley di lactancia materno cu Pro Lechi Mama mes a 'lobby' pa e ley aki bin na vigor. E ley tin 15 aña na Aruba caba, pero ta ripara cu ainda tin hopi confusion riba con pa aplica e ley aki, den e parti di e doño di trabao como tambe e trahador.

            E ley no ta diseña pa duna e mama mas dia liber ni tampoco pa perhudica e trabao. E ley ta pa duna e mama cu ta dunando pecho e oportunidad pa interumpi su trabao y tuma pauzenan cortico cada 2 - 3 ora pa e por duna su baby pecho of 'pump'.

            "Si e mama no haya e oportunidad aki e produccion ta bay atras y e mama por bira malo", Caroll Kock a splica.