Ministro Geoffrey Wever:
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, hunto cu Banco Central di Aruba (CBA), a duna presentacion na comision parlamentario CFOCS (Commissie Financiën, Overheidsorganizatie, Cultuur en Sport) tocante e avansenan den e implementacion di e Landsverordening regeling consumentenkrediet.
E ley a ser aproba na 2022 y tin como meta proteha e consumidor ora di wordo otorga un producto financiero manera un credito di placa, credito di bienes of empeña articulonan. Tambe evita credito excesivo y pone un porcentahe maximo di interes na credito, hunto cu suma maximo cu por wordo cobra pa ‘late payment fees’, ‘early payment fees’ y gastonan di incasso. Cu e regulacion aki e dunador di credito no por cobra porcentahe di interes of otro gastonan mas halto cu ley ta stipula. Actualmente no tin e regulacion aki. Segun Minister Wever, e realidad aki ta impacta no solamente e cartera di e ciudadano, sino tambe stabilidad emocional y bienestar di hopi hogar.
Den e presentacion na Parlamento Minister Wever a elabora riba e avansenan haci den implementacion di e ley. E ley ta uno sumamente complica cu mester wordo trata cu e diligencia necesario. E ley ta duna e minister di economia e autoridad pa stipula e porcentahe di interes maximo cu un dunador di credito por cobra e consumidor. Den cuadro di e complexidad di e materia y e implicacionnan di esaki e proceso pa por yega na un porcentahe di interes maximo tabata uno largo door cu mester haci investigacion y ricibi diferente consehonan. Den e proceso mester a tene na cuenta e diferente tiponan di termino di credito, e operacion di dunadornan di credito y e necesidad di cierto tipo di servicio di credito bou consumidornan. Minister Wever a indica cu ta importante pa introduci e porcentahe maximo di manera cuidadoso y responsabel y no di manera desruptivo. Pesey lo introduci e porcentahe di interes maximo pa un periodo di un aña y lo monitorea esaki pa por sigui reduci esaki na un manera prudente.
Preparacion di un kredietregistratiestelsel tambe ta parti di e ley, cual lo yuda determina si un persona por haya credito sin pone su situacion financiero den riesgo door di acumulacion excesivo di debenan. E sistema aki por ser compara cu e sistema di BKR (Bureau Kredietregistratie) na Hulanda. Banda di esaki lo tin tambe un unidad na CBA cu lo ta encarga cu supervision y handhaving di e ley.
E ley ta premira pa drenta na vigor den su totalidad 1 di januari 2027 y e intencion ta pa laga e parti cu ta regula e percentage maximo riba cierto tipo di interes drenta na vigor 1 di juli 2026 pa asina en todo caso tin proteccion civil pa e consumidornan y e dunadornan di credito por cuminsa adapta nan operacionnan na e cuadro legal nobo.
“Regulacion di credito na consumidor ta importante. Como parti di proteccion di consumidor nos no por acepta cu famianan ta keda tranca den un circulo di debe door di interesnan exagera of door di credito cu no ta responsabel. Cu e regulacion aki ta proteha e consumidor, contribui na un ‘level playing field’ den e segmento di mercado aki y yuda crea un posicion financiero mas sano pa nos hogarnan,” Minister Wever a declara.
