Minister Ursell Arends a declara:
*E proceso a bay den man di BID
ORANJESTAD (AAN)—Minister Ursell Arends, den su calidad di Minister di Transporte (demisionario) a indica, den un entrevista cu DIARIO, cu el a ricibi den e portal, e cantidad di personanan cu a aplica pa por yega na un taxi vergunning.
“Nos a premira cu pa 1 di November nos por a otorga 50 taxi vergunning; nos ta den e proceso aki nos ta scrutina e lista, huristanan ta trahando riba esaki pa wak cu tur e fechanan cu a wordo yena ta cuadra cu e data di escrutinio p’asina aki nan por bay over na otro hendenan. Esaki nos ta haci pa empodera e hulpchauffeurnan”, e dignatario a bisa.
El a señala cu e 50% e kier duna na e hulp chauffeurnan mirando cu ya caba nan tin añanan trahando den e sector aki y di e forma aki tambe nan ta facilita cu e demanda cu tin pa servicio di taxi, por wordo cumpli tambe. “Esaki ta e aspecto cu nos ta trahando riba dje. E ta durando un tiki mas cu nos a kere, pero dentro di poco nos lo anuncia ken ta e personanan cu lo yega na e 50 vergunningnan aki”, minister Ursell Arends a informa.
El a subraya cu lo publica e lista completo, p’asina hendenan por mira kendenan a cay den e 50 y esun cu ta 51 por sa cu e ta e siguiente riba e lista, pa haya un taxi vergunning manera cu e bin available.
“E proceso aki a cana den full un forma transparente, ningun departamento cu ta resorta bao di mi a atende cu esaki, nos a hinke den man di Bureau Interne Dienst (BID) cu ta esun cu a atende cu tur e peticionnan via e portal, y awor ta wordo entrega na e huristanan p’asina formaliza esaki, pa nos por publike”, Minister Arends a reitera.
