ORANJESTAD (AAN): Rachelle Lue-Goedgedrag a bishita biblioteca pa entrega di su prome buki titula ‘Louella’. Un debut cu Rachelle a lansa na november 2024.
Rachelle Lue-Goedgedrag ta mira su skirbimento y expresion propio como entretenimento y pa laga su fantasia liber. Caminda hungamento cu palabra ta un fuente di inspiracion. Inspiracion cu ta hiba e autora y su storia riba diferente ruta, sin sa adelanta con e storia ta desaroya su mes of con e ta caba. Pues un aventura riba su mes.
‘Louella’ ta un buki contemporaneo cu storia cu diferente personahe. Pa describi e ‘feel’ di e storianan Rachelle ta usa e palabranan ‘diferente’, ‘toke sensual’, ‘romantico’ y ‘yena di aventura’. ‘Louella ta un buki pa adulto. Rachelle ta hopi contento con e proceso di publica un buki a bay y ta wak bek riba un experencia bunita, aventuroso y un realisacion di su soño. Pesey e ta conseha otro escritornan tambe pa sigui skirbi y publica. Esaki ta “un buki cu lo hinca bo den un suspenso, laga bo hari pero tambe para keto na algun topico real cu varios di nos sa confronta den bida”
Rachelle Goedgedrag a nace na Aruba y a studia ‘Toegepaste Psychologie”. Semper a encanta storia cu tin un toke di creatividad, dram, chiste, pero cu ta laga bo reflexiona tocante di bisa.
E buki ta obtenibel na Libreria local y pronto tambe na biblioteca. E prome ehemplar cu Rachelle Goedgedrag a entrega na directora di Biblioteca Nacional Aruba, ta pa e coleccion nacional. Por pidi e buki tambe cerca e autora mes pa medio di Instagram.
