Segun Minister Endy Croes: --- *Cu prevencion for di trempan por mengua esaki
ORANJESTAD (AAN) -- Minister Endy Croes a señala tambe, den conferencia di prensa, cu 17% di e poblacion di Aruba tin diferente problema diabetico, cu ta costa pueblo di 75 pa 80 miyon florin pa aña.
E ta sigur cu concientizando e comunidad, cuminzando cu muchanan di scol riba e aspecto aki, ta contribui tambe na e parti preventivo unda cu por mengua e gastonan halto cu gobierno ta pagando pa e parti curativo, primordialmente den e tempo dificil cu Aruba ta bibando. El a indica cu un bleki di e refresco gaseoso mas gusta na Aruba tin 38 gram di sucu, y su boter di 20 ons cu ta hopi popular na Aruba tin 63 gram di sucu. Di su mesun ehemplo el a comenta cu e tin un aña y mey sin bebe ni un glas di e refresco concerni y e ta sinti hopi miho cu un aña y mey atras.
El a gradici su colega di Salud y Turismo, como tambe minister di Husticia y Asunto Social, pa nan contribucion den e campaña aki, cu e ta kere no mester bin di un ministerio so pero di un union di henter e comunidad. “Tur minister, tur parlamentario y henter pueblo uni por duna e paso grandi aki, pa un Aruba mas saludable”, e dignatario a subraya.
