Pa yega na un Aruba saludable!
ORANJESTAD (AAN)- Minister di Enseñanza y Deporte a duna di conoce, den conferencia di prensa, Diabierna mainta, cu como encarga cu deporte, tambe su departamentonan ta bay aporta nan programanan cu ta caba den practica, como parti di e vision di e aña aki y esnan cu ta bay lanza pronto.
Un di e programanan aki ta educa e muchanan ya caba for di scol, tanto riba comemento saludable cu ta hopi importante, den combinacion cu movecion. Y pa cu movecion su ministerio ta lanzando desde final di luna di Maart, e programa “Wi escolar” cu ta weganan escolar, cu ta competencianan inter-escolar. E dignatario a bisa cu den tur e competencianan aki seis scol lo bay clasifica den luna di Mei, y na Juni lo bay tin e famoso Olimpiada Escolar. Pa informacion specifico al respecto e mandatario lo yama un conferencia di prensa, pa splica y detaya riba esaki.
Tambe lo bay lanza un programa yama “Caya Recreativo”, cu lo tuma lugar di April padilanti, unda lo fiha minimo dos diadomingo pa luna.
E mandatario a splica cu esaki ta un concepto famoso unda lo cera diferente caya unda lo pidi pueblo, for di chikito te grandi, pa move den oranan di mainta di e diadomingonan ey, y crea asina e contribucion di gobierno riba e aspecto aki.
