ORANJESTAD (AAN): E ta importante pa nos muchanan y hobennan na Aruba sa kico ta nan derechonan.
Na momento cu un persona sa su derecho, e sa tambe cu un otro persona tambe tin derecho. E sa cu su derecho ta caba caminda esun di un otro ta cuminsa. Derecho di mucha ta un derecho humano.
E ta un instrumento pa e mucha/ hoben hunto cu su famia por solicita su derechonan den nos comunidad, pa asina e por desaroya su mes. Pa medio di conocemento tocante di derecho, e mucha ta siña di respeta, yuda y biba den harmonia cu otro personanan.
Pa di seis aña consecutivo 131 Aruba a organisa Get the Message. Pa por elabora y dialoga mas efectivo cu e mucha y hoben, e aña aki Get the Message a bay scol. Get the Message goes to school ta un proyecto cu ta haci uzo di cinco cine cortico pa siña e mucha y hoben tocante nan derechonan. E muchanan y hobenan ta mira e cine cortico, y despues ta bay den dialogo tocante e mensahe cu nan a mira den e cine, kico ta e retonan cu nan ta mira den e cine, con esaki ta na Aruba y cua ta e instancianan cu ta trata di disminui e retonan aki. Algun di e derechonan cu a ser trata ta: articulo 6, 9, 10, 18, 23, 24,27 etc.
Get the Message goes to school a ser organisa den cuadro di e celebracion di dia Internacional di derecho di mucha y 27 aña di existencia di 131 Aruba. E alumnonan di Colegio Santa Filomena y Colegio Santa Teresita a participa na Get the Message goes to school cu a tuma lugar na Teresita Center.
https://diario.aw/categories/noticia/general/131-aruba-a-organisa-get-the-message-goes-to-school-na-colegio-santa-filomena-y-colegio-santa-teresita#sigProIdc65fc30eaf