Invitacion pa esnan cu ta duna cuido sin pago na Simposio Mantelzorg 2026

Invitacion pa esnan cu ta duna cuido sin pago na Simposio Mantelzorg 2026

Rosa Leon di Stichting Mantelzorg Aruba:

ORANJESTAD (AAN) Cu e tema “Reconocemento, sosten y conexion pa nos mantelzorgers”, Stichting Mantelzorg Aruba ta invita mantelzorgers y profesionalnan pa participa na e prome Symposium Mantelzorg 2026. E encuentro lo tuma lugar diasabra 28 di november 2026, di 1:00 p.m. te 5:00 p.m., na Surfside Marina Aruba.

   Mantelzorg ta e cuido y sosten cu un persona ta duna regularmente, sin pago, na un familiar, amigo of bisiña cu mester di ayudo pa motibo di malesa, un limitacion of edad avansa. Hopi persona na Aruba ta brinda e cuido aki como parti natural di cuida un ser keri, sin realisa cu nan mes ta mantelzorger.

   Segun Rosa Leon di Stichting Mantelzorg Aruba, e simposio lo conta cu oradornan di Aruba, Bonaire, Corsou y Hulanda. E programa lo pone atencion na e necesidadnan di cuido den comunidad y ofrece consehonan practico pa mantelzorgers cuida nan mesun salud fisico y mental. Leon a señala cu, ora un persona mester carga e responsabilidad di cuido sin sosten di otro hende, e riesgo di cansancio y burnout por aumenta.

  E encuentro lo duna mantelzorgers espacio pa comparti experiencia, papia tocante e retonan cu nan ta enfrenta y conecta cu otro hende cu ta den un situacion similar.

   Profesionalnan, na nan turno, lo por scucha directamente for di mantelzorgers y dialoga cu nan tocante e tipo di sosten cu por haci diferencia den nan bida diario.

   Leon a indica cu e grupo di mantelzorgers na Aruba ta creciendo y cu 80 persona ya a registra pa e simposio. E fundacion kier recopila dato pa compronde miho nan necesidadnan y, cu e informacion ey, acerca e instancianan concerni pa busca sosten financiero pa atende e necesidadnan identifica.

   Cu e simposio, Stichting Mantelzorg Aruba kier reconoce y balora e labor cu mantelzorgers ta haci tur dia. E fundacion ta invita tanto esnan cu ta brinda cuido como profesionalnan pa aporta nan experiencia na e dialogo riba con comunidad por sostene miho esnan cu ta cuida otro.

  Pa participa na Symposium Mantelzorg 2026, por registra solamente via WhatsApp na 566-7307. Esnan cu kier haya mas informacion tocante e simposio por manda un mensahe na e mesun number.