131 a pasa evaluacion exitosamente y a wordo certifica pa 'Child Helpline International'

ORANJESTAD (AAN):  Child Helpline International ta un organisacion di impacto colectivo cu 155 organisacion como miembro,

cu ta duna ayudo telefonico y di internet na mucha y hoben den 133 pais y territorio rond mundo.

            Child Helpline International ta coordina informacion, punto di bista, conocemento y datos di su miembronan y partnernan. E recurso excepcional aki ta ser uza pa sostene sistemanan di proteccion di mucha y hoben mundialmente, regional y nacional. Tambe e ta ser uza pa sostene e miembronan di Child Helpline International den nan trabao di fortifica derecho di mucha y amplia e bos di mucha y hoben.

            Desde aña 2004 131 ta miembro di Child Helpline International. Pa mas di un ocasion 131  tawata representante di Child Helpline International pa e region di Caribe y Latino America.

            Tambe como miembro prominente 131 a yuda otro paisnan den Caribe y Latino America pa establece  nan liña di ayudo telefonico y di internet na mucha y hoben. Tambe na diferente ocacion e personal di 131 a duna diferente training na personal di otro  liña di ayudo telefonico y di internet den Caribe, Latino America, Quatar y Sur Africa.

            Un di e tareanan di Child Helpline International ta monitor e calidad di servicio y e ‘Child Safeguarding Policy’ cu su miembronan ta implementa na nan pais. E mucha y hoben buscando ayudo cerca un liña di ayudo telefonico y di internet, no mag di haye cu mas problema door di e ayudo ricibi y mester ser trata den tur seguridad. E mucha/ hoben su seguridad tan a prome lugar y e ayudo ricibi no mag di ocasiona mas problema pa e mucha. 

            Despues di un evaluacion basa ariba ‘Child Helpline International’s Core Quality Standards’ cu a start na comienso di aña 2023, 131 a ricibi e noticia cu 131 a pasa e evaluacion exitosamente.

            131 ta sumamente contento di a pasa e evaluacion aki exitosamente. Pa 131 e calidad di servicio cu ta ser duna na e muchanan y hobennan, y e seguridad cu ta ser brinda na e mucha y hoben na momento cu e ta den contacto cu un di e servicionan di 131 ta sumamente importante.

            Pa por a yega na e resultado positivo aki, 131 ta duna e mentornan diferente training henter aña, ta evalua e impacto di su servicionan y ta incorpora diferente instrumento den su maneho pa salvaguardia e seguridad di e mucha/ hoben cu ta den contacto cu un di e servicionan di 131.