ORANJESTAD (AAN): Matutino DIARIO a entrevista Erick Gamez, cu a wordo acusa pa violacion di su yiunan, y a keda deteni seis luna na KIA, y awo e ta liber pasobra no a haya prueba pero a keda seis luna cera.
El a declara cu e mama di su yiunan a acus’e cu el a abusa sexualmente di e muchanan y cu a haci actonan inmoral y abnormal cu su dos yiunan, un di siete y otro di ocho aña, ambos ta mucha homber.
E tempo cu a haci e acusacion, su yiunan tabata tin 5 cu 6 aña di edad, y segun e mama e tabata abusa di su yiunan durante dos aña. Gamez ta acentua cu na ningun momento el a haci esey.
Polis a bin busk’e na cas, nan a haci un investigacion, nan a drenta revisa full e cas, wak si tin cosnan ilegal, locual no tabata tin.
Polis a bay cu cu ne pa interogacion. E prome dia polis a gewoon papia cu Erick, e di dos dia el a wak y scucha kico e muchanan a papia. Y e mama cu e tanta a bisa cu su persona tabata penetra nan, haci cosnan inmoral cu nan, y tabata pone nan wak pornografia, ora e mama tabata bay Chines unda e tabata keda mas of menos 20 minuut y cu den e lapso ey e tabata haci esey cu su yiunan.
Erick a declara cu nunca e tabata spera esey di e mama di su dos yiunan. “Manera mi a bisa for di principio, y mi lo keda bisa, mi yiunan ta tur cos pa mi. Mi ta stima mi yiunan, mi yiunan ta mi mundo”!
El a enfatiza cu e no ta capaz di haci esey. “Mi sa cu tin hende ta haci esey, pero ami personalmente, no ta haci esey, no a yega di haci esey, y lo nunca lo mi haci esey tampoco!”.
Erick Gamez ta sinti cu e mama di su yiunan a bisa esey pa un venganza pasobra el a hay’e den nan cas cu su partner nobo cu ta traha den un medio social hopi conoci, y esaki a sosode dia 19 di Februari di e aña aki. Unico cos cu el a haci ta saca su pañanan y bay for di e cas. El a haci esaki cu polis pa nada bay for di man. E situacion a deteriora entre e cu su casa dia cu nan baby muhe a muri hoga na lama, banda di un hotel.
