10 motibo dicon ta importante pa lesa buki pa bo yiu di 3 pa 5 aña

Ora nos lesa, e ta transporta nos na un otro mundo. E mundo unda e personahenan di ficcion ta biba of unda ta siña nos di un cultura completamente diferente cu esun dibo mes.

Nos tur sa cu lesa buki pa/cu mucha ta bon pero bo tabata sa e beneficionan cu bo yiu por ricibi door di lesamento? Mester corda cu como mayor, bo tin e poder pa engrandece bo yiu su potencial pa siña, simplemente door di haci buki bira un parti integral di su bida. 

Aki ta sigui beneficionan cu bo yiu di 2 pa 5 aña tin ora bo lesa buki pe: 

1. Un relacion mas fuerte cu su mayor

Segun bo yiu ta crece, e lo cuminsa move mas, hunga, core y explora su alrededor. Sinta cerca di bo cu un buki ta yuda bo yiu y abo baha velocidad di e dia y gosa di otro su cercania. En bes di mira esaki como un area of obligacion, lesamento lo bira un actividad dushi cu ta trece boso mas cerca di otro. 

2. Miho resultado na scol

Un di e beneficionan primario di lesamento pa muchanan chikito ta un capacidad mas halto pa siñamento en general.  Hopi estudio a mustra cu muchanan cu a wordo exponi na buki y lesamento for di chikito, ta presta miho riba tur tereno di educacion. Ta logico: si un mucha tin dificultad pa lesa palabranan y frasenan, con por spera cu e ta compronde rekenen, taal, lezen y otro material cu e topa na scol? 

3. Habilidad basico pa papia

Entre 2 y 5 aña bo yiu ta siña nificacion di palabranan y con pa pronuncia nan. Ora e scucha bo lesa, bo ta reenforsa e zonidonan basico cu ta forma idioma. E zonidonan cu bo yiu cuminsa produci ta importante pasobra nan ta forma parti di e actividad di papiamento. 

4. Comprondemento di con pa lesa un buki

Mucha no ta nace sabiendo cu mester lesa di banda robes pa banda drechi of cu texto ta separa fe ilustracion y cu mester lesa di dilanti bay patras. Lesamento pa y cu mucha chikito ta siñ’e e habilidadnan simpel aki cu e mester sa pa por cuminsa lesa pa su mes. 

5. Miho habilidad pa comunica cu otro hende

Ora bo tuma tempo pa lesa pa y cu bo yiu, ta bira mas facil p’e expresa su mes y relaciona cu otro hende na un manera sano. E ta scucha di e interaccion entre hende den e storia cu bo a lesa p’e y e ta siña di e contacto cu bo durante lesamento. Esakinan ta habilidadnan importante pa por comunica cu otro hende. 

6. Dominio di idioma

Mucha cu scucha hopi storia y lanta rondona pa buki, ta mas lihe pa domina un idioma.  

7. Mas habilidad pa pensa logico

Durante lesamento, mucha ta cuminsa compronde conceptonan abstracto, aplica logica na diferente ocasion, reconoce causa y efecto y uza sano huicio. Poco poco e mucha lo cuminsa relaciona e storianan den buki cu bida diario. Loke bo ta lesa p’e ta bira mas comprendibel y atractivo p’e.  

8. Compronde y adapta na situacionnan nobo

Scucha un storia di por ehempel, bay scol pa prome bes of keda den hospital, lo yuda e mucha ora e tin cu pasa den e eventonan aki den su propio bida. Ora e scucha e storia, e lo realisa cu ta normal pa ta nervioso den situacionnan desconoci. 

9. Miho concentracion y disciplina

Na comienso ta dificil pa un mucha chikito sinta keto y concentra pa lesa full un buki. Gradualmente e ta siña sinta keto te fin di e storia. Pareu cu compronde tocante lesamento, e ta siña disciplina su mes, concentra mas largo y corda loke ela lesa. Tur esakinan ta importante pa su siñamento na scol. 

10. E comprondemento cu lesamento ta great

Lesamento cu y pa mucha chikito, ta siña mucha cu lesamento ta un treat y no un tarea. Mucha cu wordo expone na hopi lesamento, hopi biaha lo prefera lesa buki cu wak television of hunga wega electronico. 

Buki tin e poder pa beneficia mucha den hopi manera. Laga bo yiu wak bo lesa buki. Si bo kier pa bo yiu lesa y abo mes no ta haci’e, e ta pensa cu lesamento no ta importante. Como mayor, lesa buki pa y cu bo yiu ta un di e miho cosnan cu bo por haci pa prepara bo yiu cu un fundeshi pa su futuro academico exitoso! 

Fuente: www.earlymoments.com, “10 reasons why you should read to your kids”.

Pa informacion of pregunta por acerca Fundacion Pa Nos Muchanan -