Esaki ta e medidanan cu a drenta na vigor diadomingo 22 di Augustus

Prome Minister Evelyn Wever-Croes:  --- *Toque de queda ta cuminsa 10 pm

ORANJESTAD (AAN):  Diasabra mainta, Gobierno di Aruba y Crisis Team a anuncia medidanan pa loke ta trata combatimento di Covid-19. Prome Minister Evelyn Wever-Croes a expresa cu si Aruba completo para hunto, por logra domina e situacion cu Aruba ta aden.

            A anuncia e siguiente medidanan:

- Toque de queda 10.00 pm - 5.00 am

- Orario di ciere 9.00 pm - 5.00 am

- Max 4 persona na mesa den restaurant, paden y pafo

- Den tur establecimento nocturno por tin solamente hende sinta.

- Samenscholingsverbod 24 ora

- Bishita na cas, fiesta y encuentro social na cas of otro caminda ta prohibi

- Comercio limita na 50% (cinema, tienda, supermercado, entiero, misa)

- Deporte, limita na training so, competencia no ta permiti

             Medidanan na vigor caba ta keda aplicable: uzo di tapaboca obligatorio den establecimentonan. Alcoholverbod riba caminda publico 24 ora. Distancia fisico.

            “Mi ta pidi tur hende encarecidamente cooperacion pa cu esaki. Nos conoce e ultimo reglanan, posibilidadnan y excepcionnan pero pa mayoria di nos cu no tin excepcion, porfabor mantene na dje’.

             No ta discuti si por tene fiesta of no tene fiesta. Pa awe Dialuna varios operacion a wordo cancela aunke con dolor e personanan ta sinti y e consecuencia cu esaki ta trece cu ne. Nan tin di warda den dolor y sin por cana of drumi. Esey ta e situacion cu Aruba ta den.

            Nos por discuti si por of no haci fiesta. Polis por drenta pa para fiesta si of no. Pero nos kier haci un apelacion civico di cada persona. Tin dokternan cu ta scucha e conferencia di prensa, enfermeronan ta lesa comentarionan riba facebook y ta puntra nan mes si realmente aki na Aruba nos ta realisa e seriedad di e situacion cu nos ta aden.

            Pasonan cu nos a tuma awe, ta hunto nos mester tene na nan pa asina nos por enfrenta e situacion cu nos ta aden. Ta net ora nos a kere cu nos ta saliendo di e peor di e crisis, e variante Delta a cuminsa plama agresivamente rond mundo y esaki ta hopi mas contagioso cu MERS, SARS y hasta cu EBOLA. Ban nos tur respeta y mantene na e medidanan aki pa asina pronto nos por sali for di e situacion aki”, Prome Minister Evelyn Wever-Croes a manifesta.