Na e momento cu e colonistanan “Pilgrim Fathers” na Merca a logra nan prome cosecha na e continente nobo, nan a hinca rudia y a gradici Dios.
Merca a ricibi un herencia cu a wordo pasa pa henter mundo. E cantidad di famianan cu awe lo reuni na mesa pa yama Dios danki pa tur loke nan a ricibi, a crece den un situacion mundial cu sigur ta haci posibel pa nos comprende e motibo cu e Pilgrim Fathers a gradici Creador.
Awe nos ta cumpra un ticket pa bay Merca. Nos ta subi avion pa yega nos destinacion, caminda nos tin acomodacion sigura te ora nos bolbe cas.
Nos tin garantianan cu e prome colonistanan di Merca no tabata tin ora nan a subi un barco di bela pa cruza Oceano Atlantico.
Nan mester a laga atras nan posesionnan, pa subi lama bruto y yega e pais desconoci.
Na Merca, caminda nan a planta pa por a come den un suela, cu nan no por a cultiva cu ekipo y machinenan grandi cu awe nos conoce.
Nan a logra. Nan a hinca rudia y nan a yama Dios danki.
Nan deseo di a forma un futuro nobo a wordo cristalisa den e cosecha, cu a duna nan cuminda pa alimenta nan mes y sigui traha y sigui biba den un futuro desconoci, na un pais cu nan mester a sigui explora.
E fugitivonan di persecucion religioso na Europa, no por a idea cu despues di tanto tempo, na Aruba famianan lo a uni pa yama danki na nos Creador pa tur fabor.
Yama danki na Dios pa tur fabor. Esaki ta Thanksgiving.
Awe e ta ocasion pa nos yama danki, cu nos tabata tin e barco Aruba, cu a haya asistencia di Reino, pa por a cruza oceano di tanto problema cu e pais a conoce.
Aruba awe ta traha riba un cosecha, un recuperacion di e pais, cu a financieramente y economicamente, a wordo destrui dor di situacionnan financiero y un pandemia desconoci y invisibel cu a ataca sin piedad.
Na 2020, Dios a yuda Aruba sigui cana. Sigui sembra.
Aruba tabata tin bendicion di un lider cu hasta na e momentonan mas scur, a duna animo pa sigui bay dilanti.
Awe Aruba ta gradici pa su cosecha, cu e mester proteha.
Na momento cu e Pilgrim Fathers a hinca rudia, nan tabata sa cu tin mas reto nan dilanti. Pero nan acto di gratitud a duna prueba, cu nan tabata sigur cu nan lo a sobrevivi futuro tambe, manera a socede.
Awe dia di yama danki, DIARIO tambe ta demostra gratitud na nos Creador, na nos lectornan, nos comunidad, cu a sostene nos pa nos cruza lama bruto den cual nos tambe ta nabega.
Awe nos ta yama danki cu e certeza cu nos ta entrega futuro generacionnan prueba di e capacidad di e Pueblo Arubano luchador, pa cu fe den Dios sigui dilanti!
Feliz Thanksgiving Aruba!
