Awe luna di October ta haci su entrada. Un luna dedica na e miembronan di comunidad, conoci como adulto mayor.
E hecho cu mas y mas mundo ta papia di “adulto mayor” ora e ta papia di e grupo cu edad avansa den comunidad, ta duna prueba di e cambionan cu a presenta nan mes den comunidad pa loke ta trata e gruponan di edad.
Cambionan significarivo, cu ta exigi adaptacion di maneho mundial den asunto di e parti creciente di comunidad mundial cu ta alcansa un edad halto y cu edad no ta impedi pa keda activo y hasta independiente.
Pa DIARIO e asulto mayor ta ocupa un lugar sumamente importante. Mas cu cuarenta aña pasa, e personanan cu awe ta adulto mayor, tabata adulto y hunto cu hobennan di e tempo tabata lucha pa un Aruba autonomo pa e Arubiano.
Den e tempo aki, autonomia tabata tin un sentido real pa e comunidad Arubano cu a lucha pa reconocemento di e Arubiano, cu su propio Papiamento, su propio cultura, su propio pakete di interes nacional cu un participacion den Reino y na mundo, cu tabata confirma Aruba como un Pueblo.
E lucha di Status Aparte tabata mas cu un lucha pa cambio estatal pa e comunidad cu tabata tin necesidad pa comunica na su idioma, a base di su ortografia, su moral.
E adulto mayor di awe, hunto cu e grupo di edad medio cu a alcansa 40 aña, ta directamente conecta na e fundacion di DIARIO dor di Jossy Mehsen Mansur, e Arubiano y pionero, fundador di DIARIO.
Den DIARIO ta topa cu e historia di e lucha di e prome ciudadanonan di e pais Aruba, di cual e grupo di adulto mayor, ta forma un parti importante.
Hunto nos a lucha pa sigui cana den un tempo di progreso y adelanto di un mundo cu tabata desaroya cu velocidad halto y den cual edad di hende a sigui subi y cambio grandi a introduci su mes den e edad cu hende ta alcansa y e forma cu hende ta alcansa un edad mas halto.
Hunto cu DIARIO, adultonan mayor mester a tuma nota di cambionan mundial na cual mester a adapta.
E cambio di mas importante sigur ta e forma cu e adulto mayor por sigui biba na forma independiente na edadnan mas halto, por sigui participa activamente na su comunidad y ta keda parti activo di un mundo cu cambio grandi.
Adultonan mayor ta un generacion di luchador, di inspiracion pa perseverancia cu Aruba mester na e momentonan crucial cu mundo mester di recuperacion.
DIARIO ta uno cu e lucha di adulto mayor pa reconocemento di e realidadnan nobo di comunidad, den cual e adulto mayor mester ocupa e lugar cu e merece como constructor di un pais nobo.
E adulto mayor ta prueba di e capacidad y talento di e Arubiano, pa haci y logra loke ta parce imposibel y asina habri caminda pa un futuro, cu mester tin un lugar special pa e constructornan y e prome generacion di ciudadanonan di e pais Aruba cu a habri porta pa e stop di papia di 60+ pero cuminsa papia di un comunidad caminda ya bida no ta cuminsa na 40 pero na 60.
