Na 2021 si puntra hende kico ta haci falta, loke mas ta bini dilanti ta e sentido di paz. E sentido pa a pesar di tur problema, keda optimista y coopera pa e cambio positivo cu ta depende di tur hende.
Pa 2021 por cera cu speranza pa futuro, Pasco mester bira atrobe, e momento cu nos ta yena nos mes cu luz, animo, fe, speranza y alegria cu ta e ingredientenan di paz.
Pa Pasco por ta Pasco, mester bolbe na e prome Pasco cu ta mara na un suceso religioso cu ta nacemento di e Rey di Paz den un stal di Bethelhem.
Pasco ta e final di un biahe di un pareha, Maria y Hose, cu mester a bay Bethelhem pa registra nan mes como miembronan di e Cas di David, den cual e Salbador di Hende mester a nace segun promesa di Dios.
Na Bethelhem, Hesus a nace y un Luz a cende pa mundo. E luz di e strea cu tres Rey a sigui pa por a topa cu e Rey nobo.
Wardadornan di carne a worde sorprendi pa canto celestial den scuridad di anochi y angelnan alegre cu tabata duna gloria na Dios y tabata alegra den paz pa hende.
Segun e fiesta religioso di Pasco, e mundo nobo cu nos tur ta spera, a bira realidad alrededor di 2021 aña pasa ora un calender nobo a worde introduci.
Sigur den Siglo 20, celebracion di Pasco a worde transforma. El a bira Santa Claus cu ta baila. El a bira fiesta mundano y su caracter religioso a perde balor.
Celebracionnan religioso, ta duna sosten y animo na hende cu no ta solamente curpa pero tambe mente y alma.
Tur religion conoce observacionnan cu ta duna animo pa deshaci di elementonan cu ta stroba hende di biba na paz cu su mes y asina aporta na un comunidad feliz y cu animo pa sigui dilanti den e problemanan mas serio cu por presenta.
Religion Cristian cu e fiesta di Pasco, ta hiba hende na e cumplimento di e promesa di Dios, cu un dia hende lo bolbe na e Paraiso pa conoce paz real.
Si observa plannan di organizacionnan mundial, por mira intentonan pa comberti mundo den un paraiso sin hamber, cu oportunidad pa tur hende, posibilidad pa tur hende desaroya nan felicidad.
Felicidad y bienestar ta e paraiso cu tur hende ta busca como hende pero cu ta worde confronta cu negativismo, cu egoismo, cu rabia y odio.
Pasco ta e fiesta Cristian, cu ta basa riba union di hende y e promesa di solucion pa problemanan.
Pasco ta e fiesta di luz cu Covid-19, falta di produccion di articulonan, falta di placa, egoismo, odio y envidia ta stroba nos mira.
Pasco ta un fiesta di fe, cu ta duna animo pa tres Rey cana den scuridad, pa wardadornan bandona nan carnenan y pa hende lubida tur problema un rato y mira futuro cu fe.
Awe nos ta entrega comunidad di Aruba e mensahe di alegria di Pasco.
Aruba lo conoce un futuro nobo. Arubianismo lo triunfa ora nos brasa otro atrobe sin miedo di malesa, sin ansia pa hunto traha riba un futuro den Nomber di Dios!
Bon Pasco, Aruba!
