Na momento cu 2021 a bati na porta, un aña cu exigencianan grandi a haci su entrada.
E pandemia ocasiona pa e Coronavirus nobo, no tabata tin un posicion solitario den e pakete di prioridad di mundo, den cual ta figura e cambio di clima y adaptacion di mundo na e demanda di tecnologia, e realisacion di e plan pa deshaci di hamber y miseria na 2050.
Den tur e desaroyonan aki e ser humano mester a defende no solamente su bienestar financiero, pero tambe mester a defini e moral di temponan moderno.
E contenido di discusionnan di clima por wordo resumi den un frase cortico. Petroleo, cu sigur den Segunda Guera Mundial a bira bonanza grandi pa hopi pais, awor mester pasa pa olvido.
Esaki ta parti di e herencia cu lo wordo entrega na 2022, ora mester dicidi con ta atende cu economia di cantidad di pais, ora mester scrap petroleo riba e lista di actividad economico mundial.
E reto cu ta sperana 2022 pues, ta pa reemplasa petroleo como actividad comercial internacional.
E guera cu por spera a bini dilanti na 2021, ora OPEC a dicidi di subi prijs di petroleo. Tur prijs a subi tur caminda na mundo.
Na 2022 e guera entorno petroleo, lo uni su mes cu otro aspectonan di e recuperacion mundial riba tereno financiero, economico y asina social.
Den e reto grandi di 2022 pues, e mundo nobo crea despues di Gueranan Mundial, lo culmina na un mundo di interdependencia total di paisnan.
Ora ta papia di recuperacion na 2022, no por mira Aruba isola for di mundo, pero mester mira Aruba como parti integral di mundo.
E Pandemia, e crisis di clima, e crisis cu por spera den e salida di petroleo ta entrega na hende e reto di creacion di un mundo nobo, inversion nobo di placa, sistemanan nobo di educacion, formulanan nobo pa mantencion di cuido medico costoso, inversion den auto electrico, y asina nos por sigui.
2022 lo no ta facil pero lo ta sumamente exigente y hasta dificil debi na e situacion financiero y comercial mundial.
2021 a prepara Aruba pa e reto grandi aki. Gobierno a presenta plannan concreto. Prensa lo hunga e papel crucial como informador di Pueblo.
DIARIO, manera el a prepara for di 2021 a prepara su mes pa e reto. Pa cambio. Pa inicio di un mundo nobo cu lo nace e siman aki cu entrada di 2022.
Esaki ta pa DIARIO pues e momento pa duna su lectornan garantia cu nan por sigui conta cu tur informacion pa por enfrenta e exigencianan nobo di 2022.
Na despedida di 2021, sigur nos mester yama danki na nos fiel lectornan. Na tur instancia y informantenan experto cu ta permiti nos cumpli cu nos deber di matutino di Aruba.
Expresando e deseo ferviente pa nos tur hunto duna contenido na e exito di 2022, nos ta desea Aruba, un feliz 2022! Ariba Aruba.
