Den un mundo cu ta sigui lucha cu un pandemia y na un Aruba cu un ola di problema y tension politico, Diadomingo ta celebra Dia di Mama.
Ya na 2020, e dia cu ta recorda e persona central den bida di tur ser humano, a tuma luga den situacionnan di emergencia debi na Covid-19, cu a percura pa awe na Aruba e celebracion di Dia di Mama tin un toque doloroso pa tur cu a perde e centro di nan famia.
E grupo cu mas a wordo afecta dor di e pandemia tabata e grupo cu mas comunidad a trata di proteha, debi na e hecho cu nan tabata forma e grupo di riesgo mas halto.
For di momento cu Covid-19 a presenta su mes, e momentonan mas bunita entre mama y yiu y madushi cu nietonan, a wordo interumpi. Contacto precioso, un sunchi of un brasa, a wordo gescrap a base di e peligro cu esaki a bira.
Medionan moderno pa comunica a permiti pa contacto wordo mantene cu uzo di computer, tablet of telefon cu a yuda sin duda pa tanto grandinan como familiarnan por a soluciona e kiebra di relacionnan mas importante den bida di un ser humano.
No mester lubida den esaki, e hecho cu fronteranan cera y menasa di e coronavirus pa biaheronan, a haci cu hopi mama y madushi, no por mira nan yiunan y nietonan cu ta biba den exterior personalmente.
Dia di Mama ta un dia sentimental. E ta un dia cu ta pone para keto na e aspecto mas grandi di un ser humano cu ta su sentimentonan cu ta produci alegria y dolor.
E fin di siman aki, sigur nos grandinan, lo keda encanta si manteniendo reglanan oficial, e generacionnan mas hoben logra kibra nan barera di soledad, e falta grandi di un toque personal.
Na casnan di anciano sin duda, personal cualifica por yuda crea oportunidad pa alivia e dolor di soledad di tanto madushi y mama, cu lo keda encanta cu un toke personal.
Un flor di cura di cas cu un nieto segun reglanan vigente ta entrega. Un cantica special cu ta canta pa e ser central den nos bida.
Dia di Mama 2021 ta exigi di e generacion cu no por biba sin celular pa interumpi e cadena di app, pa intercambia palabranan cu e sernan, cu tanto ta depende di nan prueba di amor y gratitud.
DIARIO awe ta invita tur yiu, tur nieto, pa pone tur otro cos un banda y pa entrega prueba di amor na personanan cu ta depende di esaki riba e dia grandi cu ta Dia di Mama.
Na mes momento nos ta felicita tur mama, tur madushi, pero tambe tur pariente of amiga di famianan cu segun nos sistema Arubano, a fungi como mama pa personanan cu nan a stima y cuida como yiu.
Nos ta pidi bendicion di Dios pa tur cu den nan bida, a yena mundo cu e sentimento mas bunita cu por tin den mundo, cu ta e amor cu ta brota di e ser cu nos ta yama “Mama”.
Nos ta pidi consuelo pa tur, cu awe no tin nan mama of nan madushi of e persona cu a tene nan man den bida na un forma special.
Un fin di siman special a cuminsa. Un fin di siman cu e aroma special di amor!
.
