Ora hende a perde paraiso, el a haya e tarea pa pone comunidad funciona a base di trabou. Adam y Eva a pone hende perde e beneficio di por biba sin ningun preocupacion pa mantene nan mes na bida.
Na careda nan mester a cuminsa traha paña pa nan bisti, busca cuminda pa nan come y un luga pa nan biba. Nan responsabilidad basico pa traha pa sostene nan mes, a cuminsa na e momento y ta e prome herencia cu un hende ta ricibi ora e nace.
Trabou ta dicidi pa sobrevivencia di hende y comunidad, cu awe mester reconstrui su actividadnan di produccion pa garantisa cu miembronan di comunidad por mantene nan mes na bida y tin e forma pa paga pa su cuminda, pa tur su gastonan personal incluso su cuido medico den e pandemia actual.
Na momento cu Covid-19 a paralisa produccion humano, paisnan mester a busca forma pa reemplasa trabou temporalmente. Pa haci esaki Gobierno mester a uza fondonan pa sostene fuente di trabou.
Gobierno Wever-Croes a entrega yudansa financiero na e fuente di trabou, cu ta comercio cu a keda sin e entrada cu normalmente economia como productor di placa pa un pais y su ciudadanonan ta genera.
Esaki ta mustra riba e realidad cu ta comercio ta e alma di economia. Comercio, cu ta liber na paisnan democratico manera Aruba.
Pa medio di e proceso comercial, economia ta haya contenido. E empresario ta presenta capital y bon maneho di su compania. E empresario tambe ta trahado. Si un empresario no traha, su negoshi ta kibra.
E empresario ta negosha den productonan, cu ta produccion di trabou di trahadonan cu ta empresario, pasobra e trahado ta bende su trabou cu e empresa cu ta paga cu un salario.
Mescos cu un hende no ta cumpra un articulo cu no ta bon den un tienda, un empresario tin e derecho pa rechasa mal produccion di un trahador.
Trabou ta dicidi riba entrada di un pais, cu ta trabou di Gobierno, cu mester atrae trabou pero percura tambe pa e empresanan cu e atrae, por mira bon resultado di nan inversion cu ta nan produccion pa e pais.
Ora un compania establece na un pais, e trabou di inversionista ta cuminsa pa e inversionista por paga su mes, paga su trahadonan y keda cu placa pa e negoshi no kibra. Si e inversionista establece su mes na un pais, cu ta kibra su negoshi, e mester cera su porta.
Aruba ta den e proceso di recuperacion, cu ta nifica cu mester normalisa e produccion nacional pa medio di trabou di parti di empresa y trahado.
E periodo 1 di Mei 2021 pa 1 di Mei 2022, mester bira pues responsabilidad di Gobierno pa aumenta e cantidad di empresa productivo loke lo aumenta cupo di trabou, cu lo depende di e responsabilidad di empleadonan cu ta entrega trabou como e producto cu nan ta bende cu companianan.
E calidad di e trabou cu ta wordo entrega door di empleadonan ta dicidi si Aruba lo por funciona como paraiso pa personanan cu pa impedimento legitimo manera salud y edad, no por participa na produccion economico.
Futuro pues ta depende di bon trabou colectivo di un comunidad.
