E necesidad pa sigui importa trahador ta mishi cu bienestar social
*Atende peso social di overheated economy cu Inteligencia Artificial
*Den porta di Aruba e disputa pa azeta di Essequibo ta bolbe rementa
ORANJESTAD(AAN)—Paso a paso DIARIO durante ultimo añanan, a prepara Aruba pa e situacion mundial cu awor ta culmina y realmente ta concentra riba e conkista economico mundial economico di tempo moderno, cu ta negoshi di petroleo.
Na momento cu DIARIO tabata traha riba su produccion pa edicion di 16 di Mei 2025, informacionnan ta sigui drenta di desaroyonan alarmante den porta di Aruba, caminda e sonido di un guera entre Venezuela y Guayana pa petroleo cu ta rikeza di Essequibo, ta bolbe resona.
Un situacion cu lo aumenta e ansia di tanto Venezolano, cu dictadura di Nicolas Maduro a comberti di ciudadano rico di e pais pa mendigo social na tanto parti di mundo, ta presenta atrobe dilanti costa di Aruba, caminda tema di discusion ta con por aumenta cantidad di empleado pa honra e demanda di economia.
DIARIO continuamente a adverti pa e problemanan serio cu Aruba lo encontra si preferencia sigui wordo duna na atraccion di trahadornan den un economia Arubano cu mester sirbi un comunidad di alrededor di 110 Mil Arubano.
Informantenan ariba tereno economico na Aruba ta sumamente preocupa. No por sigui adapta na poblacion na crecemento di un economia cu claramente ya a bandona e limitenan cu e mester sirbi como base di produccion financiero y social pa e pais.
Aruba ta un isla cu un teritorio limita, cu e no por expande. Aruba no ta parti di un continente, cu por permiti trahadornan di otro pais traha na Aruba aunke nan mester cruza frontera diariamente.
E cantidad di permiso cu mester wordo duna ainda pa honra e necesidad economico di e pais, cu ta basa ariba servicio, ya ta aumenta e cargamento di responsabilidad legal y social di Aruba como pais den tur situacion cu por presenta.
“Mundo ta exigi paisnan pa prepara pa guera. Kico ta pasa na Aruba si sigui importa ciudadano si den cualkier situacion mundial, Aruba como pais dependiente di otro paisnan, den un situacion manera di Covid-19 tin un sobre peso social crea pa immigracion,”informantenan clave a trece dilanti.
Manera ta wordo mustra Hulanda como pais mas grandi di Reino mes a mustra cu e no por sigui carga mas peso pa situacionnan mundial cu semper a bati na porta di Reino Hulandes, conoci den epoca moderno pa su trankilidad y crecemento economico.
E exito di Aruba pa un gran parti ta debi tambe na e trankilidad di e pais, condicionnan social di bida y un cuadro di ley protector di e ser humano.
Buskeda di expertonan cualifica den ramonan hopi exigente, ta un hecho rond mundo.
Sinembargo, na Aruba e necesidad pa atrae trahadornan na tur nivel, a wordo crea pa un economia cu ta exigi mas y mas personal, cu ta bira problema social pa e exigencianan cu responsabilidad di Aruba pa cada habitante, ta trece cune.
Ya por papia di falta di vivienda. Pero den esaki no ta tene cuenta tampoco cu e cantidad di viviendanan cu por worde afecta den un desastre y cu lo exigi acomodacion cu no tin.
A mustra con den tempo di Covid-19 Aruba mester a cera su economia y a crea un debe enorme pa e por a sigui atende cu e necesidadnan basico di su poblacion.
Er situacion mundial ta sumamente serio manera lidernan mundial ta trece dilanti y Aruba cu ta parti di un continente carga cu problema social, no tin e espacio pa acomoda hende ni e entrada pa mantene hende, si algo pasa cu turismo cu ta asina vulnerabel.
Informantenan ta indica cu Aruba mester tene cuenta cu desaroyonan den porta di su cas, manera e conflicto di Essequibo, caminda Venezuela ta confronta Guyana cu tin sosten den su lucha pa mantene su teritorio actual.
Manera expertonan ta indica na Aruba, responsabilidad hasta mara na democracia, ta exigi pa awor atende cu e economia di Aruba cu ta overheated, fuera di proporcion pa un pais manera Aruba, cu a crea un situacion economico cu un responsabilidad social enorme cu no ta permiti ningun problema, ya cu por ehempel un problema social por ta causante di efectonan negativo pa economia basa riba turismo.
Informantenan a analisa e problema sumamente alarmante pa Aruba y a mustra cu migracion ta e problema cu paisnan grandi kier resolve y ta creando tension mundial.
Expertonan ta para ariba nan punto cu Aruba no por sigui crece aruba tereno economico pasobra Aruba no tin e basenan mas importante pa sostene un economia sigur no basa riba necesidad di ser humano, cu mester di un pakete social sumamente exigente pa hasta evita problemanan serio cu falta di aspectonan social por produci.
