Director Ing. Roland Croes:
ORANJESTAD (AAN)—Director di SETAR NV, Ing. Roland Croes, durante e bishita oficial di Minister Arthur Dowers na e compania, a elabora tocante e sistema di fiber cu a wordo instala na scolnan.
Ing. Croes a indica cu SETAR a cuminza cu e proyecto aki mas of menos tres aña pasa, el a inicia como un proyecto piloto, na un prijs hopi accesible pa stimula educacion.
El a splica cu, basicamente, loke SETAR ta purba haci ta, sponsor yuda yen di organizacion pa diferente meta. Tur esey pa SETAR ta cay bao di SDG’s, sosteni door di Nacionnan Uni, y un di nan, na cual a referi e dia aki yama: “Quality Education”.
“Mundo a cambia, bo kier ta conecta cu Internet, bo ta haya bo informacion eynan mes, no esey so, pa studiante tambe ta cambia, nan tambe a custumbra cu internet, nan ta gusta wak e cosnan interactive e manera di traha aworaki, y scolnan tambe tin cu bay make it”, ing. Croes a bisa.
Director di SETAR a menciona e temporada di pandemia, unda cu scolnan a purba un y otro manera pa duna tur studiante e les cu nan por a sigui.
“Como SETAR nos por a pensa cu e ora a yega cu sigui contribui na un forma mas activo, mas agresivo, cu basicamente nos a duna scolnan oportunidad pa keda special pa nan. 70% mas barata y hopi capacidad”, el a indica.
Y Tambe, el a menciona e capacidad for di scol pa si un dia algo pasa, scol por set up un sistema unda por duna lesnan na, manera alumnonan cu ta na cas manera a yega di sosode y cu e ta desea pa no pasa nunca mas. E tabata un momento masha dificil mes, ing. Roland Croes a bisa.
Tur esaki, segun Roland Croes, ta pas den un total di proyectonan, locual e kier a menciona. El a splica cu despues di e pandemia SETAR a contribui cu casi 800 tablet. Esaki a nifica casi 1 miyon florin na tablets pa muchanan cu tabata tin necesidad di un tablet conecta. “E tempo a pasa y mi ta calcula rapidamente, mi ta kere un cuater aña cu nos a yuda scolnan cu Wifi, laptops cu nos a contribui cu ne, y tur e asuntonan cu nos a contribui pa yuda scol y maestronan, etc., nos a yega, mi ta kere na un suma, mi ta sigur banda di 4 miyon, si no ta mas”, señor Roland Croes a señala.
El a agrega cu tin tambe e parti di duna bek na comunidad, como compania, y den e caso aki ta, duna educacion cu den bista di SETAR ta e aspecto di mas importante tambe, pa Aruba.
