Tracy van der Biezen cu informacion importante:
ORANJESTAD (AAN) – Den conferencia di prensa cu a tuma lugar na Universidad di Aruba, e hoben studiante Tracy van der Biezen, a duna informacion tocante e evento cu ta bay tuma lugar Diaranson awo, dia 10 di Januari, na U.A, entre 6’or di atardi y 9’or di anochi.
“E evento aki lo yama ‘Nos tambe tin di bisa’, y e ta un momento pa nos bin hunto y discuti con nos por contribui na e desaroyo di Aruba, particularmente riba temanan cu por afecta e hobennan’, van der Biezen a indica.
El a sigui splica cu aña pasa el a forma parti di un grupo di hoben cu yama “Overseas Countries & Territories Youth Network” unda cu e hunto cu cuater hoben mas a representa Aruba.
“Esaki tabata pa influencia e contenido di e proyecto Europeo, manera Erasmus Plus, pa por ta miho pa e hobennan di Aruba. Eynan mi a realiza cu mi ta presenta mi mesun punto di bista, y lo ta bon si mi por a representa mas hoben tambe. Awo mi ta studiante na Hulanda, y eynan den grupo di trabao mi ta yuda e representante di Nacionnan Uni y di Reino Hulandes”, van der Biezen a duna di conoce.
El a agrega cu e aña aki hunto cu ACJ Commission y e grupo di trabao, nan a logra un evento pa trece e hobennan den dialogo, cual lo ta diaranson awo, dia 10 di Januari.
“E ta importante pa e hobennan por tin di bisa riba ehecucion y planeamento di maneho na Aruba, pa nos tin un vision y nan sa cu tambe ta inclui hoben. E enfoke lo ta riba derecho humano, bienestar social, y participacion di hoben, unda nan por trece dilanti nan punto di bista y discuti con nan kier wordo representa nacional y internacionalmente. Por ehemplo via un panel di hoben of un representante internacional, manera tin na Hulanda”, Tracy van der Biezen a señala.
El a añadi cu a base di e informacion cu nan ricibi, lo duna e representacionnan di hoben na Aruba un relato, y tambe lo comparti esaki cu Nacionnan Uni y Reino Hulandes.
