Un total di 80 atleta a participa den di 8 edicion di 'Fitville Caribbean Championship' 2023

ORANJESTAD (AAN): Durante fin di siman, a tuma luga e di ocho (8) edicion di Fitville Caribbean Championship organisa pa Functional Fitness Federation Aruba. Minister Endy Croes tabata presente, hunto cu su kerida esposa Dilaila Croes.

Un total di 80 atleta tanto local como internacional di, entre otro, Colombia, Curaçao, Suriname, USA, Brasil y Hungaria a competi den e campeonato di crossfit. Minister Endy Croes a hiba palabra na e ocasion special aki unda el a enfatisa riba e balornan olimpico manera amistad y respect cu ta algo cu nos mester tene presente. Nos mester duna contenido na e balornan aki. “Tin respet pa bo mes, respet pa otro, respet pa e reglanan di competencia y respet pa e deporte”, Minister Endy Croes a expresa.

Deporte ta sano y e ta crea un miho persona pa sociedad, pa e motibo aki nos ta sostene deporte den su totalidad. Commandant di Marinierskazerne Sr. Tim van Wijk tambe a hiba palabra e mainta aki.

Por ultimo, Minister Endy Croes ta felicita e organisadonan Sr. Wil Erasmus y henter su team y e boluntarionan cu un competencia bon organisa y sumanente exitoso. Tambe, mandatario di Deporte ta gradici Marinierskazerne pa nan colaboracion den e evento deportivo aki. Pabien na e ganadonan! Cu deseo, disciplina, dedicacion y determinacion ta logra.