Un total di 7 candidato a postula nan mes pa bira presidente di Comite Olimpico Internacional

Nicole Hoevertsz:

ORANJESTAD (AAN): Durante algun sesion hopi importante na Lausanne, Suiza, unda e cede di Comite Olimpico Internacional ta ubica, a logra scucha tur candidato cu a postula nan mes pa bira e presidente nobo di Comite Olimpico Internacional (IOC).  Nicole Hoevertsz, kende ta vice presidente di Comite Olimpico International, a duna un splicacion riba esaki.

Segun Hoevertsz, e 7 personanan cu a postula nan mes como candidato pa presidencia di Comite Olimpico Internacional a haya e oportunidad pa reuni cu tur e mas o menos 100 miembro di IOC.

Durante apenas 15 minuut cada un di e candidatonan a duna un presentacion riba kico nan plannan ta, kico nan vision ta cu e organizacion y kico nan ideanan ta pa futuro di e organizacion aki.

“Siendo presidente di e Comite Olimpico Internacional bo ta compromete bo mes pa durante e prome periodo di 8 aña, cu e posibilidad pa prolonga esey cu 4 aña mas”.

En total pues bo no por ta presidente di IOC pa mas cu 12 aña, segun Hoevertsz.

El a sigui bisa cu di e 7 personanan cu a postula nan mes como candidato, 6 ta hende homber y 1 ta hende muher. 

Segun Hoevertsz, mayoria di e candidatonan ta di Europa, mientras cu tin un persona di Japon y un di Africa.

“Tur di nan tin nan ideanan riba kico nan kier haci cu e Comite Olimpico Internacional”.

Entre 18 cu 21 di Maart na Grecia ta bay tin e eleccion  di e siguiente presidente di IOC.

E ora ey e presidente actual Thomas Bach ta bay acompaña y prepara e siguiente presidente, pa asina e traspaso oficial tuma lugar riba Dia Olimpico, cu ta 23 di Juni.