Un fabuloso warm-up ride spontaneo di miembronan di Shoco Legends

ORANJESTAD (AAN): Den oranan di atardi, DIARIO a topa cu un grupo di Bikers ta gozando di un Ride spontaneo den area di Pos Chikito.

   Den un entrevista cu Jean Marc, kende ta president di e grupo Shoco Legends Aruba Bike Club, el a splica cu e atardi ey tur cos a cuminza manera un ‘ban sali Diadomingo’ den grupo so.  Y diripiente e mensahe lo a plama, y diripiente ta diferente Biker a yega y a uni na esaki.

   E dirigente di Shoco Legends kiermeen cu semper nan ta pro pa tin union den e Bikernan, y ora cu a ripara cu tin varios Biker ta acercando, nan a djis ricibi nan cu braza habri y uni pa asina por socializa aun mihor, y cera mas amistad.  E tabata un fenomenal ‘Warm-Up Ride” manera nan mes a yame.

   Desde cu Carnaval a finaliza, no tin nada di coremento rond andando.  Pasobra tur hende a relaha.  Pero awor nan a djis bay core rond na forma safe, y haya momento agradable pa combersa.  A compronde si, cu hopi di nan ta sperando e fecha yega pa e Camacuri Ride.

   Pa Shoco Legends mes, nan tambe tin un actividad grandi di Shoco Kings Fest 2023 Ride oficial poni riba agenda pa fin di April 2023, y nan ta trahando riba tur e preparacionnan.  Shoco Legends su Ride lo bay tin Bikers di Curaçao tambe ta participando.  Segun Jean Marc, ya caba 2 container a wordo confirma di lo yega Aruba cu Bikes di e isla ruman.

   Shoco Kings Fest 2023 lo ta di 25 di April te cu 2 di Mei venidero.  Lo tin ride riba Dia di Rey, 27 di April, y tambe otro ride riba 1 di Mei.