Tur cos ta cla pa e torneo internacional di Bolas Criollas

ORANJESTAD(AAN): Den luna di September riba 1, 2, 3 y 4, ta bay tuma lugar un torneo internacional di Bolas Criollas na Papaya Ranch.

Den un entrevista cu Robert Feliciano di Bolas Criollas International, el a splica cu originalmente e torneo mester tabata 3 dia, pero mirando e interes asina grandi di hungadornan di Aruba, Boneiro y Corsow, a pone un dia extra.

E equiponan di Aruba ta train tur Diamars y tur Diahuebs for di 7’or di anochi y segun Feliciano e smak y dedicacion ta asina grandi cu for di 6’or di atardi caba miembronan di e diferente equiponan ta presenta caba na training.

“E lugar ta cla, e cancha y e luznan tambe, mientras cu a verf e lugar”.

Tur cos ta cla pa nos cuminza, segun Feliciano, kende a indica cu e torneo ta bay consisti di 29 equipo di Aruba, 20 di Corsow y 16 di Boneiro.

Esaki ta un record pa Boneiro y Corsow.

Feliciano a indica cu apesar cu Diahuebs e torneo ta cuminza, e apertura oficial ta bay ta Diabierna.

Riba Diahuebs e weganan ta bay ta di 7or di anochi te cu 10’or, mientras cu Diabierna e apertura ta 7’or di anochi y e prome wega ta 7:30.

E weganan riba e dia ey ta caba 12’or di marduga.

Feliciano a indica cu Diasabra ta bay ta e dia mas pisa, mirando cu ta bay tin 66 wega ta bay tuma lugar.

Tur cos ta cuminza Diasabra 11’or di mainta y esaki ta bay te cu 10’or di anochi.