Tremendo apertura di Weganan Interinsular 2023

ORANJESTAD (AAN): Diabierna atardi, na Cruyff Court Denzel Dumfries na Jaburibari a tuma luga e gran apertura di Weganan Interinsular 2023.

Despues di siete aña Weganan Interinsular entre e scolnan di Aruba, Boneiro y Curaçao ta tumando luga bek.

   Na luna di maart di e aña aki Weganan Interinsular 2023 a inicia na Boneiro unda cu e scolnan a participa den e disciplina di dam y schaak. Sigui na Curaçao, unda e hobennan a participa den e disciplina di atletismo y trefbal.

   Fin di siman, Weganan Interinsular a continua na nos dushi isla. Durante e ceremonia di apertura di Weganan Interinsular Diputado di Boneiro Sr. James Kroon, Minister di Curaçao, Sr. Sithree van Heydoorn, Presidente di Parlamento di Aruba, Sr. Edgard Vrolijk, Minister Endy Croes, Minister Dangui Oduber, Parlamentarionan di Coalicion: Sra. Shailiny Tromp – Lee, Sra. Darlaine Guedez – Erasmus, Sr. Ricky Hoek, Sr. Marco Berlis,  Sr. Raymond Kamperveen y demas invitadonan presente a presencia un bunita desfile, impresionante show di acrobaat di RCC Aruba y NGS Unique brassband.

   Minister Endy Croes a hiba palabra unda a enfatisa cu deporte ta un medio pa forma y crea lider y personanan cu habilidadnan pa organisa y guia otro riba diferente tereno. P’esey un pais mester crea e base y condicionnan pa su habitantenan y particularmente pa nos chikito- y hobennan pa por haya oportunidadnan pa desaroya nan mes den deporte, recreacion y actividad fisico.  El a sigui bisa cu hunto y cu henter e desaroyo aki e parti di educacion ta hunga un rol sumamente importante.

   E formacion na scol hunto cu e lesnan di educacion fisico ta brinda un base general pa crea hobennan prepara pa desaroya nan mes den futuro den cualkier ramo of profesion. Tambe nos lider y tecniconan den deporte merece di haya oportunidad pa forma nan mes y asina yuda den e desaroyo di formacion di atletanan.

   P’esey un palabra di gradicimento na tur maestro di scol, tecniconan di deporte, boluntarionan y specialmente na e mayornan di nos hobennan cu awe ta participa den Weganan Interinsular 2023, masha danki y sigui stimula nos muchanan pa sigui practica deporte.