ORANJESTAD (AAN): E team di hobennan di ciclismo BMX Rough Riders Aruba a bira ganado di Copa Hubenil Gobernador Felipe B. Tromp pa aña. 2023.
Durante aña 2022 te cu april 2023 e hobennan, di edad di seis pa diescinco aña a sa di destaca localmente y na nivel internacional.
E team a keda funda oficialmente na aña 2012 y actualmente tin diescinco miembro active cu ta train regularmente y prepara nan mes pa caredanan local y internacional. Pa loke ta e concerni e participacion internacional, mester menciona cu tur gasto ta keda cubri pa e propio team y mayornan. E fondonan cu nan ta recauda ta pa medio di actividadnan manera bendemento di cuminda, bolo y rifa.
Y tur inversion den material manera uniform y bicicleta tambe ta cubri pa e propio coredornan y nan mayornan.
Durante 2022 y 2023, Rough Riders a gana varios careda na Aruba organisa pa diferente team y Aruba Wielrenners Bond.
Tres coredor a gana e titulo di Campeon Nacional di Aruba, cuatro coredor a bay cu e premio di Sub Campeon Nacional di Aruba y tres coredor a logra e di tres lugar di Campeon Nacional di Aruba.
Na nivel internacional e hobennan a participa na caredanan na Estados Unidos, Colombia y e Campeonato mundial na Francia.
E team a logra trece un total di nobenta y cinco trofeo Aruba.
Na Merca e hobennan a participa na competencia manera na Sunshine State Nationals na West Palm Beach, Florida. Otro competencianan tabata na Lone Star National na Houston Texas; Carolina Nationals na Rock Hill, South Carolina; Dixieland Nationals na Atlanta, Georgia; Music City Nationals na Nasville, Texas; Derby Nationals na Louisville, Kentucky; Gator Nationals na Oldsmar, Florida; Silver Dollar National na Las Vegas. Na Nantes, Francia e hoben Kailen Wouters a compete entre e 56 mihonan di mundo y ta logra keda na di cinco lugar den categoria di ocho aña. Kailen ta bira campeon di e competencia di Festival de las luces na Medellin, Colombia. Asher Geerman ta keda na di shete lugar. Aki a participa diferente coredor di Latino America.
Tur e logronan aki ta danki na e dedicacion di e propio coredornan, e apoyo di nan mayornan y e trabou inmenso di coach Gregory Wouters.
E coredornan ta keto bay den preparacion pa diferente careda internacional na Merca, Latino America y e Campeonato mundial na Glasgow, Escocia.
Dia 27 di april, Dia di Rey, e miembronan di Rough Riders Aruba lo ricibi e trofeo ganado for di man di Gobernador Alfonso Boekhoudt durante un ceremonia den Wilhelmina Park cuminsando pa 9 or di mainta.
