Total di 64 grupo lo ta den campeonato di Mens Erger Je Niet Live di 2024

ORANJESTAD (AAN): E registro a keda cla, y tur cos ta mustra cu un total di 64 grupo local a inscribi pa participa den e popular campeonato di Mens Erger Je Niet Live 2024.

   Esey nifica, cu otro siman Diasabra dia 20 di April, un total di 64 grupo ta bay desfila den e 16 aniversario di e popular wega di Mens Erger Je Niet LIVE. E colorido, famoso y bunita desfile ta cuminsa 7:30 pm exacto.

   Despues di e desfile, ta bay anuncia dos tremendo premio, pa e grupo cu mas ambiente y e grupo mas grandi!. Y e prome wega ta bay entre: Pasa Raspa Get Fit, Pv 2 Good 4U, Jolly Jokers y The Beef People.

   E temporada di hopi nervio, emocion, tension, alegria, decepcion, suerte y hopi harimento ta cuminsa atrobe. Centro di Bario Brazil ta invita nos pueblo pa haci un bishita na e Centro tur diabierna y diasabra durante 3 luna di campeonato. Nos Cushina/Plus ta Bon surti. E aña aki atrobe ta bay tin hopi sorpresa.