Tokon Dojo cu tremendo resultado na e 7th IFK USA International Kyokushin Championship

ORANJESTAD (AAN):  Tokon Dojo, representando International Federation of Kyokushin Karate (IFK) Aruba,

a hunga un tremendo papel na e 7th IFK USA International Kyokushin Championship, cu a tuma luga dia 1 di februari ultimo na Atlantic City, New Jersey.

            Nuebe atleta sumamente dedica y bon prepara a participa den tanto Kata (forma tradicional) como Kumite (pelea ‘full contact’). Na final, Tokon Dojo a trece un cantidad impresionante di medaya bek Aruba, confirmando su luga den e mundo internacional di Kyokushin.

            E torneo, cu a trece hunto mas di 200 participante di 49 dojo y 3 diferente pais, tabata un evento altamente competitivo, unda nos atletanan Arubiano a demostra nan talento, disciplina, y specialmente nan espirito di combate. 

Resultadonan di e AC Team di Tokon Dojo (Wak grafico adhunto) 

            "E torneo aki tabata un bes mas un test berdadero di dedicacion y abilidad di nos atletanan, y mi ta sumamente feliz cu nos resultadonan. Pa mira miembronan di nos team para riba e podium ey, hunto cu competidonan asina fuerte, ta un testimonio di nan trabou duro y di e nivel halto di nos Kyokushin na Tokon Dojo," Sensei Zairo Ruiz, head coach y instructor principal di Tokon Dojo, a declara.

            E 7th IFK USA International Kyokushin Championship a atrae algun di e miho atletanan di Kyokushin for di USA, y e resultado impresionante di Tokon Dojo ta refleha e compromiso di e dojo pa excelencia y crecemento di e disciplina di Kyokushin Karate na Aruba.