Tin 141 nominado pa ricibi Premio Excelencia den Deporte 2021

ORANJESTAD (AAN) – Diahuebs atardi, Minister di Enseñanza Endy Croes a presenta, den conferencia di prensa, e proyecto “Premio Excelencia den Deporte”,

den J.F.K Education Center, pa cual tin 141 nominado, cu no a wordo menciona ainda. Seguidamente, un resumen di e relato di e mandatario.

E conferencia di prensa a tuma lugar den presencia di e directornan di e Federacionnan Deportivo, Parlamentarionan, Atletanan, Lotto pa Deporte, IBiSA, entre otro. Y tambe Miss Universe Aruba 2022.

E mandatario a papia extensamente y a bisa cu e proyecto aki en realidad tin hopi aña di existencia, y hasta a cambia nomber na caminda. E ta un proyecto unda ta duna reconocemento na tur e atletanan cu a duna un bon prestacion durante henter un aña.

Minister Croes a expresa cu ta un honor pa duna e reconocemento aki, pero tambe ta un honor pa e atleta cu ricibi e premio aki.

El a señala cu como un deportista pa hopi aña hungando den seleccion di softball, tanto di Hulanda como di Aruba, y cu tin hopi titulo, e por compronde bon kico cada atleta ta biba di dje ora e ta prepara, traha duro y bay competencia, cu e deseo di ta exitoso y gana. Pa e motibo aki e por comparti e sentimento di e atletanan presente, pasobra e mesun amor y pasion cu nan tin, e tambe tabata tin y tin te awe pasobra e ta core den su adernan.

El a expresa con bunita ta ora ta representa Aruba den un competencia localmente of den exterior, scucha e Himno Nacional resona, y mira Aruba su bandera wordo hisa. “Esaki ta yena bo cu hopi orguyo”!

E mandatario a agrega cu deporte ta algo cu ta unifica e pueblo. E ta trece union, y ta un vehiculo cu ta forma caracter y ta forma miho ciudadanonan pa su sociedad. Y deporte tambe ta e vehiculo cu ta forma hopi lider den e comunidad. E ta convenci cu e atletanan presente lo bira ciudadanonan cu lo duna un contribucion substancial na Pais Aruba. Durante un proximo evento e premionan lo wordo otorga na e atletanan y nan federacion respectivo.

E cantidad di atletanan nomina ta 141 pa nan respectivo federacion. Parlamentario Shailiny Tromp Lee a felicita nan y cada mayor pa nan sacrificio, pa a duna nan aporte, a acompaña nan semper riba veld.