Team Snor a clausura aña 2024 cu tremendo ‘Nos cu Nos’

ORANESTAD (AAN): Den mundo di Domino, e asina yama “Team Snor”, e ekipo practicamente “home team” dje palacio di domino aya na Kudawecha/Calabas,

e famosisimo y mundialmente conoci Domino Square Garden, a clausura aña 2024 c’un tremendo torneo “Nos cu Nos”. Un aña por cierto cu a bay invicto pa Team Snor, e ekipo bou liderazgo dje flamante “Snor” Perez.

   Diadomingo 8 di december, cuminsando pa 2 or di merdia, despues di un “peptalk” di “Snor” Perez splicando su vision pa 2095, e integrantenan di Team Snor a pone nan emocion “op nul”, y a cuminsa bataya otro pa wak ken ta bay cas e aña aki cu e famoso y tan anhela “Snor wisselbeker”.

   E bataya ta ranca sali “a toda maquina”, y den prome rond, Ronny Gomez y Lee Thompson ta manda Obispo y Joshua loser’s round; Snor cu Nassy ta pone Glenda cu Pol bay sinta back den banki; Gilbert y Junior no tin piedad pa Romana y Wilson; y por ultimo Tony cu Piero ta suta Roy cu Stanley. Den di dos buelta, Ronny cu Lee ta traha un Nasi Goreng di Snor cu Nassy; Gilbert y Junior ta duna un mocion di desconfianza na Tony y Piero. Den e tremendo semifinal, Rony cu Lee ta baha cabes pa Gilbert y Junior kendenan ta bay warda confortablemente ken lo sali victorioso di Loser’s Round!

  Den Loser’s Round e caminda ta largo! Romana cu Wilson ta dobla Glenda cu Pol den envelop, plak stampia y manda nan cas; Obispo ta hacui un oracion pa su patna Joshua y nan dos “con el poder del mas allá” ta logra core cu Roy cu Stanley. Pero, e oracion no a wanta mucho: Romana cu Wilson ta haci un exorcismo riba Obispo y Joshua! Fuera!

   Tony cu Piero ta tira Snor cu Nassy den drum, pa despues pone Romana y Wilson tambe den e pakete di “Retour to Sender”! Den e ultimo bataya di Loser’s Round, Lee cu Ronny ta “terminate” Tony cu Piero nan “dream” p’e aña 2024. E gran final ta bay aden entre Gilbert cu Junior vs Ronny cu Lee, y despues di un bataya di corta rosea, finalmente Ronny Gomez y Lee Thompson ta sali campeon “Nos cu Nos” 2024! Team Snor ta clausura 2024 den un tremendo ambiente y kier desea tur fanatico di domino y pueblo di Aruba en general un Bon Pasco y Prospero 2025.