Team di Britannia a derota Dakota cu score di 2-0 den competencia U17

ORANJESTAD (AAN): Riba Diabierna atardi a tuma lugar na Compleho Deportivo Franklyn Bareño na Piedra Plat, e wega den categoria U17 entre team di SV Dakota y SV Britannia.

   E wega a start cu un balanza total unda ambos equipo tabata mas fuerte, y cada uno tratando di domina e bala den cada hugada, pero sin resultado pa laga esaki drenta goal di oponente.

   Esaki a sigui cada rato unda tur dos team a produci atakenan cu tabata mustra di ta alentador, pero cu e bon trabao di keeper a sa di mantene e score na 0-0 ora cu prome mitar a finaliza.

   Den segundo mitar, e team di SV Britannia a pone extra presion, y cu algun paso di precision, a sa di yega te dilanti goal y asina a anota e prome goal.  Unavez cu e score tabata 1-0, e team di Britannia a keda cu e mesun presion, aunke Dakota a sa di busca forma pa haya e goal di empate.

   Faltando algun minuut prome cu pitazo final, ata  SV Britannia a logra di anota un goal mas pa asina haci e score 2-0, y esey a bira e conteo final tambe.

   E goalnan di SV Britannia a wordo anota pa Arien y tambe Edgar.