Taekwondo Team Aruba su team di TK5 a gana Merca

ORANJESTAD (AAN): Den fin di siman Taekwondo Team Aruba a participa den e Worldwide Martial Arts na Orlando, Florida cu e team di TK5 cu e meta di bringa y gana Merca.

   Aña pasa Aruba su team di TK5 a perde contra di Merca y a keda empata na un gana y un perdi. Awo Aruba a gana Merca pa di dos biaha.

   Grand Master Melvin Rasmijn head di Taekwondo Team Aruba a forma e team di 6 atleta pa enfrenta Merca.

   Den e prome rond di 5 contra 5 Aruba a cuminsa cu 18 punto atras contra di e Mericanonan, pero esaki a cambia cada biaha cu haci cambio den e atletanan y Aruba a gana e prome rond cu un score di 51-44. Den e di dos rond di 5 minuut, Aruba a gana cu un score di 32-16 contra di e team di Merca. Cu un alegria grandi Taekwondo Team Aruba a celebra su victoria contra di e team di Merca na Orlando.