Ta cua grupo lo titula campeon di Mens Erger Je Niet Live

Diabierna lo haya sa

ORANJESTAD (AAN): E momentonan tenso ta yegando, y ya caba ta hopi fanatico ta loco pa sa ta cua grupo lo titula Campeon di ‘Mens Erger Je Niet Live 2026’.

   Esaki ta un campeonato cu a cuminsa dia 25 di April cu 64 grupo.  Pero mañan Diabierna dia 3 di Juli, e campeonato di Mens Erger Je Niet ta bay conoce su campeon mundial di Mens Erger Je Niet Live 2026.  Claro ta mundial pasobra aki na Aruba so e wega aki ta tuma luga y den Centro di Bario Brazil, cu ta e centro amigo di tur Centronan y famianan rond di Aruba.

    Diabierna dia 3 di Juli 8:00pm ta hunga pa campeon den categoria B, esta e teamnan di Setar Pevesa, Dushi Yiu, Screngerenge‎, y Heavy Yiu.

   Despues ta hunga pa Campeon Mundial e cuater gruponan invicto, esta P.V. Sinta Riba Dje, Who's Next, Leysner & De Cuba, y Hunga Malo Pasa Bon.

   Un danki inmenso ta bay na tur e 64 grupo di famia, colega y bisiña cu a cuminsa den e campeonato 2026.

Y un danki di curason na e boluntarionan di Centro di Bario Brazil cu ta yuda tur fin di siman.