SV Royal Power Tat Fat ta gana Stingers den un wega elegante den Copa Noord 2025

Copa Noord 2025 organisa pa Royal Power Tat Fat y Heineken:

ORANJESTAD (AAN): Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya patronisa pa HEINEKEN a continua diadomingo ultimo cu varios wega valido na veld di Kudawecha.

            Diadomingo pa 145pm e miembro nobo di Copa Noord “Stingers” a debuta den gran forma contra  SV Royal Power Tat Fat. SV Royal Power tambe ta mira su prome aparecion bek despues di 5 aña den Copa Noord 2025. Mester duna credito na e hobennan di Stingers kendenan a perform bon pa 4 inning largo manteniendo e wega cu un score minimo di 1-0 contra.

            Despues di 4 inning Royal Power a rally pa asina habri e wega un poko unda Royal Power Tat Fat finalmente ta logra un victoria di 9-1 riba Stingers. Royal Power Tat Fat9 careda, 14 hit, 1 eror. Stingers 1 careda, 4 hit y no ta comete error.

            Sendley “Bartolo Colon” Danies ta bay 4 inning perfecto teniendo e wega bou control te momento Alexander Groeneveld di Stingers ta topa un recta y ta deposite tras di muraya den centerleft pa un cuadrangular cual ta bira tambe e unico careda di Stingers. Jomark Flanegin ta drenta releva Sendley Danies den 5 inning y ta bay cu e wega salba riba su nomber.  Alexander Groeneveld ta resulta pitcher perdedor. Mihor bateadornan pa Royal Power Tat Fat ta resulta Jomark Flanegin kende su bate tabata na candela y a bay di 3-3, Giandrick Lacle di 4-2 cu un homerun “inside the park”, Eldrick Dijkhoff y Gillian Wernet ta bay ambos di 4-2. Pa Stingers a destaca na plato Alexander Groeneveld kende a bay di 3-2, Daveny Lynch y Trevor Geerman di 3-1.  

            Fanaticada  a biba cu e wega cada momento. Copa Noord 2025 lo continua diasabra awor 24 di mei cu 3 partido amistoso 5pm,7pm y 9pm mientras diadomingo 25 di mei un tabla lo bula. Cuminsando pa 11 am Bad Boys lo enfrenta Stingers,  sigui pa 1245pm Kudawecha Redskins vs Super Plus, 2.30pm Calabas Blue Jays lo topa Royal Power y pa 4.15pm Kudawecha Indians lo topa Salbabo.

            Tur 8 ekipo lo mira accion diadomingo awor. Ambiente lo bay ta tremendo. Diadomingo awor Bo tin un compromiso na veld di Kudawecha.