SV Estrella lo carga nomber di Banco di Caribe durante e campeonato 2021-2022

Diabierna a batiza nan uniform nobo cu e team lo estrena awe

ORANJESTAD (AAN) – Presidente di SV Estrella, Denchi Werleman, a splica den un entrevista cu DIARIO, cu Diabierna ultimo atardi, a tuma lugar e bautismo di nan uniform nobo.

E biaha aki e ta carga e nomber di Banco di Caribe, door cu un di nan hungadornan ta core stage na e banco aki, el a acerca Gerencia pa sponsor e uniformnan y nan a acepta pa sponsor Estrella, pa e campeonato 2021-2022.

Awendia ta hopi dificil pa haya sponsor y SV Estrella ta sumamente gradici cu Banco di Caribe ta sponsor e division di honor di Estrella, señor Werleman a subraya.

El a duna di conoce cu SV Estrella a menciona cu nan tin 11 punto y e aña aki nan a haya yen di contratempo, tin hungado lesiona y ketobay tin problema cu entrenador.  No obstante e ta sigur cu SV Estrella lo gana pa mantene su division di honor, pa otro aña si nan tey miho representa.

Diasabra awo 9 di April, Estrella lo hunga contra La Fama pa 8’or na Stadion Guillermo Prospero Trinidad.

Giovanni Croes, Manager Director di Banco di Caribe a bisa cu esaki tabata un ocasion special, pasobra e banco ta un di e sponsornan principal di e uniform di Estrella Division Honor, y awe ya caba lo por mira e team estrenando nan uniform nobo aki.